Муҳаммад ибни Абдурраҳмон Оли Сонӣ, сарвазир ва вазири корҳои хориҷии Қатар гуфт, ки Эрон ҳамсояи Қатар аст ва ҳамеша чунин боқӣ хоҳад монд.

Ӯ дар суҳбат бо журналист Пирс Морган афзуд, ки Қатар ва Эрон даҳсолаҳо бо эҳтироми мутақобил муносибат доштаанд.

Тибқи гуфтаи ӯ, ҳарчанд таҳримҳо сатҳи ҳамкории ду кишварро маҳдуд кардаанд, Қатар талош намудааст, ки муносибатҳои ҳамсоягиро бо Эрон нигоҳ дорад.

“Мо ба ҷое намеравем ва онҳо ҳам ба ҷое намераванд”- таъкид кардааст сарвазири Қатар.

Муҳаммад ибни Абдурруҳамон Оли Сонӣ ҳамзамон эътироф намудааст, ки миёни ду кишвар дар тӯли даҳсолаҳо дар масъалаи сиёсӣ ихтилофҳои зиёд вуҷуд доштааст.

Сарвазири Қатар иттиҳомҳои дахолат ба сиёсати Иёлоти Муттаҳидаи Амрикоро рад кардааст. Вай аз маъракаҳои иттилоотӣ бар зидди Қатар интиқод намуда, афзудааст, ки талошҳо барои таҳриф кардани воқеият ба нафъи гурӯҳҳои муайян сурат мегирад.

Ба гуфтаи ӯ, расонаҳои Исроил қаблан дар хусуси оғози як маърака бар зидди Қатар гузориш дода буд. Сарвазири Қатар, инчунин, ба нақши кишвараш дар талошҳои миёнҷигарӣ барои поён додани ҷанги Ғазза таъкид намудааст.

Бенямин Нетаняҳу иддао кардааст, ки ҳампаймононаш талошҳои миёнҷигари Қатарро барои хотима додан ба ҷанг халалдор кардаанд.

Сарвазири Қатар гуфтааст: “Мо Ихвон-ул-муслимин ва ҳаракатҳои ИМА-ро маблағгузорӣ намекунем ва чунин иттиҳомҳо беасос аст”.

Ӯ гуфт, агар Қатар воқеан ба воситаи сармоягузорӣ ва нуфуз дар донишгоҳҳои ИМА чунин таъсири густурда дошта бошад, пас мебоист Вашингтон ин кишварро яке аз муҳимтарин гирандагони кумаки худ медонист.

Dialog.tj