Артиши Амрико ду низоми дигари мушакии “Патриот”-ро барои ҳифзи иншооти энергетикӣ дар Арабистони Саудӣ ва Қатар ирсол кардааст.

Ба гузориши расонаи амрикоии “Аксиос” як сомонаи “Патриот” моҳи гузашта барои ҳифзи як иншооти муҳимми нафтӣ ба Арабистони Саудӣ фиристода шудааст. Низоми дигар барои дифоъ аз як таъсисоти гази табиӣ дар Қатар мустақар шудааст.

Ба гуфтаи ин расона, ҳадаф аз ин иқдом итминон додан ба ҳарду кишварҳо аст, ки агар Доналд Трамп, раиси ҷумҳури Амрико, ҳамлаҳо алайҳи Эронро аз сар гирад, Вашингтон аз иншоотҳои муҳимми энержии онҳо ҳимоят хоҳад кард.

Пештар Пентагон эълон карда буд, ки бо ширкати “Локҳид Мартин” (Lockheed Martin Corporation) барои тавлиди мушакҳои боздорандаи низоми “Патриот” ба арзиши 58 миллиарду 600 миллион доллар қарордод бастааст.

Ин қарордод ҳафтсола буда, тавлид ва хариди мушакҳои “Патриот”-ро аз соли 2026 то 2032 дар бар мегирад.

Ширкати “Локҳид Мартин” гуфтааст, ки иқтидори тавлиди мушакҳои такмилёфтаи “Патриот” (PAC-3 MSE)-ро то охири соли 2030 се баробар зиёд мекунад. Ин ширкат ҳамчунин, шумораи кормандони корхонаи худ дар Арканзасро 50 дарсад афзоиш хоҳад дод.

“Ройтерз” гузориш додааст, ки Пентагон аз ширкатҳои тавлидкунандаи ин мушакҳо мехоҳад суръати истеҳсолро бештар кунанд. Ҳукумати Трамп низ барои афзоиши тавлиди таҷҳизоти дифоӣ ба ширкатҳо фишор меорад.

Дар ҳамин ҳол, Маркази мутолиоти стратегӣ ва байналмилалӣ (CSIS), воқеъ дар Вашингтон, тахмин кардааст, ки артиши Амрико ҳоло камтар аз 1000 мушаки боздорандаи “Патриот” ва камтар аз 250 мушаки “ТАД” (THAAD) дар ихтиёр дорад.

Гуфтанист, ки ин ду низоми дифоӣ дар даргириҳои Ховари Миёна ба таври густурда истифода шудаанд.

Dialog.tj