Владимир Путин, раиси ҷумҳури Русия, гуфтааст, ки ин кишвар то замоне ки таҳримҳо алайҳи Маскав бардошта нашаванд, дизели худро ба бозорҳои ҷаҳонӣ пешниҳод нахоҳад кард.

Расонаҳои Русия рӯзи панҷшанбе, 1-уми октябр, гузориш додаанд, ки Путин ин изҳоротро дар нишасти «Валдай» дар Маскав баён кардааст.

Путин гуфтааст, Русия ба андозаи кофӣ дизел дорад, аммо ба далели таҳримҳо ва маҳдудиятҳои мавҷуда, ин сӯзишворӣ ба бозорҳои ҷаҳонӣ нахоҳад расид.

Ӯ ҳамчунин, гуфтааст, ки ҳамлаҳои Украина ба корхонаҳои коркарди нафти Русия то ҳадде ба ҳадафҳои худ расида ва тақрибан як дарсади маҷмуи маҳсулоти дохилии Русияро зиён расонидааст.

Путин афзудааст, ки Русия ҳоло дар ҳоли посух додан ба ҳамлаҳои Украина аст.

Бар асоси гузоришҳои матбуотӣ, Русия ин ҳафта низ манъи содироти дизел аз ҷониби истеҳсолкунандагони сӯзишвориро то охири моҳи октябр тамдид кардааст.

Ин тасмим дар ҳоле гирифта шудааст, ки бозори ҷаҳонии энержӣ ба далели ҷангҳо ва коҳиши пешниҳоди сӯзишворӣ таҳти фишор қарор дорад.

Dialog.tj