Расонаҳои амрикоӣ хабар доданд, ки изҳороти Доналд Трамп, Президенти Иёлоти Муттаҳидаи Амрико дар мавриди истифодаи қанди найшакар дар нӯшокии маъруфи Кока-кола боиси баҳсҳои ҷиддӣ шудааст.

Ҷон Мерфи, мудири молиявии ширкати “Кока-кола” дар суҳбат бо “Блумберг” гуфт, ки истеҳсоли версияи “аслӣ” –и ин нӯшокӣ бинобар камбудии ин маводи хом дар бозори Амрико бо сустӣ пеш меравад.

“Иҷрои ин тарҳ тадриҷӣ хоҳад буд, зеро миқдори найшакари мавҷуд дар Амрико маҳдуд аст” – зикр кардааст ӯ.

Ширкати “Кока-кола” дар даҳаи 1980 баъд аз боло рафтани нархи ҷаҳонии қанд ва маҳдудиятҳои воридотӣ истифодаи найшакар ва лаблабӯро қатъ намуда, ба ҷои он шарбати ҷуворимаккаро ҷойгузин кардааст, ки дар Амрико арзонтар ва дастрастар мебошад. Бо ин вуҷуд, нӯшокиҳои тавлидшудаи Мексика, ки ҳамоно бо найшакар омода мешаванд, дар бозори Амрико рӯз ба рӯз маъруфият пайдо кардаанд.

Доналд Трамп дар моҳи июли соли ҷорӣ бо шуру ҳайяҷон гуфта буд, ки бо роҳбарони Кока-кола дар хусуси истифодаи қанди воқеӣ гуфтугӯ намудааст ва ширкат бо ин тағйир розӣ шудааст. Вале вокуниши расмии Кока-кола фарқ мекард. Ширкат фақат ваъда дод, ки ба зудӣ ҷузъиёти бештар дар хусуси инноватсияҳои нав дар маҷмуи маҳсулоти худ эълон хоҳад кард.

Танишҳо вақте шиддат гирифтанд, ки Кока-кола аз изҳороти Трамп дар бораи истифодаи найшакар интиқод намуд ва гуфт, ки шарбати ҷуворимакка низ амн аст ва аз лиҳози калория ва усули мубодилаи моддаҳо фарқи чашмгире бо қанд надорад.

Dialog.tj