Ҷумҳурии Тоҷикистон ба даҳгонаи амнтарин кишварҳои ҷаҳон ворид шуда, дар раддабандии нави “Global Safety Report – 2025”, ки аз сӯи Институти амрикоии Gallup омода шудааст, ҷойи дуюмро ишғол намуд.

Тибқи ин гузориш, ки бар асоси таҳқиқот дар 142 кишвар анҷом дода шудааст, 95% шаҳрвандони Тоҷикистон гуфтаанд, ки ҳатто дар вақти сайругаштҳои шабона худро бехатар эҳсос мекунанд.

Ҷойи аввалро Сингапур бо нишондоди 98% соҳиб шудааст.

Дар ин даҳгона ҳамчунин, кишварҳои Чин (94%), Умон (94%), Арабистони Саудӣ (93%), Кувайт (91%), Норвегия (91%), Баҳрайн (90%) ва Имороти Муттаҳидаи Араб (90%) шомил гардидаанд.

Ин гузориш таъкид мекунад, ки Тоҷикистон дар чанд соли ахир пайваста миёни кишварҳои пешсаф аз рӯи сатҳи амният қарор мегирад.

Ба гуфтаи таҳлилгарон чунин натиҷа тасдиқи самаранокии сиёсати давлатӣ дар самти таъмини субот, тартиботи ҷамъиятӣ ва ҳифзи ҳуқуқи шаҳрвандон мебошад. Нозирон илова мекунанд, ки фазои устувори ҷамъиятӣ, амнияти шаҳрҳову деҳот, ҳамчунин, меҳмондории суннатии тоҷикон ҳамчун арзишҳои муҳим аз сӯи ҷомеаи ҷаҳонӣ пазируфта шудаанд.

Ҳузури Тоҷикистон дар қатори кишварҳое, ки аз ҷониби ҷомеаи ҷаҳонӣ ба ҳайси пешсафон дар соҳаи амнияти ҷамъиятӣ шинохта шудаанд, обруву эътибори мусбати ҷумҳуриро дар арсаи байналмилалӣ боз ҳам мустаҳкам месозад.

Dialog.tj