Тавре ки Вазорати фарҳанги Ҷумҳурии Тоҷикистон хабар медиҳад, дирӯз, 10-уми июн даври дуюми Озмуни ҷумҳуриявии «Тоҷикистон — Ватани азизи ман» дар Вилояти Мухтори Кӯҳистони Бадахшон, вилоятҳои Суғду Хатлон, шаҳри Душанбе ва шаҳру ноҳияҳои тобеи ҷумҳурӣ оғоз гардида, то 5-уми июл идома меёбад.

Бинобар иттилои дастрас, дар даври якуми Озмуни ҷумҳуриявии «Тоҷикистон — Ватани азизи ман», ки аз 1-уми апрел то 10-уми май дар маркази шаҳру ноҳияҳои ҷамҳурӣ доир шуда буд, 6192 довталаб иштирок карда буданд.

Гуфта мешавад, аз миёни 6192 кас 2676 нафар ба даври дуюми озмун роҳхат гирифтанд, ки акнун миёни худ рақобат хоҳанд кард.

Бояд гуфт, ки Озмуни ҷумҳуриявии «Тоҷикистон-Ватани азизи ман» бо сарпарастии Президенти Ҷумҳурии Тоҷикистон муҳтарам Эмомалӣ Раҳмон доир гашта, барои баргузор кардани он дар соли равон ҳафт миллиону шашсаду ҳаштод ҳазор сомонӣ ҷудо шудааст.

Ёдовар мешавем, ки Озмуни ҷумҳуриявии «Тоҷикистон-Ватани азизи ман» бо мақсади дарёфти истеъдодҳои нави соҳаи санъат, рушди минбаъдаи малакаву маҳорати касбии онҳо, баланд бардоштани мақому маҳорати касбӣ, тақвият бахшидан ба касбияти баланди ҳунари иҷрокунандагӣ ва эҷоди асарҳои нави мусиқӣ роҳандозӣ мегардад.

Dialog.tj