Дар ҳафтаи ҷорӣ нархи картошка дар бозорҳои Қазоқистон афзоиш ёфт ва ҳукумати ин кишвар тасмим гирифт, нархро танзим кунад.

Дар пасманзари якбора боло рафтани нархи картошка дар чандин минтақаҳои Қазоқистон ҳукумат тасмим гирифт, ки содироти сабзавот ба кишварҳои сеюмро дар тӯли 6 моҳ маҳдуд кунад. Дар ин хусус аз Ҳукумати Қазоқистон ба ВАО хабар додаанд.

Бар асоси иттилои Дафтари матбуоти Ҳукумат бо супориши сарвазир вазоратҳои кишоварзӣ ва савдо вазифадор шудаанд, ки вазъи бозори картошкаро мунтазам таҳти назорат дошта бошанд.

“Ба далели афзоиши тақозо аз кишварҳои ҳамсоя, бахусус Ӯзбекистон ва боло рафтани арзиши содирот дар соли ҷорӣ, содироти картошка 1, 5 баробар афзудааст: аз 411 ҳазор тонна ба 605 ҳазор тонна расидааст. Талаботи зиёдатӣ ба бозори дохилӣ таъсир расонид”- таъкид мекунад Дафтари матбуоти Ҳукумати Қазоқистон.

Барои танзим ва ба эътидол овардани нархи картошка дар бозорҳои дохилӣ дар маҷлиси Комиссияи байниидоравии фаъолони соҳаи савдо, ки рӯзи 18-уми январ баргузор шуд, дар бораи маҳдуд кардани содироти картошка ба кишварҳои сеюм ба муддати 6 моҳ тасмим гирифта шуд.

“Ин маҳдудият ба кишварҳои Иттиҳоди иқтисодии Авруосиё дахл надорад, аммо содирот дар ин самт назорат хоҳад шуд. Ҳамзамон, бо назардошти вазъи мавҷуда, додани сертификатҳои фитосанитарӣ барои содирот аз 16-уми январ пурра боз дошта шуд”- иттилоъ додааст Дафтари матбуоти Ҳукумати Қазоқистон.

Гуфта мешавад, ки тадбирҳои андешидашуда ба таъмини устувори нархи картошка, пешгирии болоравии беасос ва пешгирӣ аз амалҳои спеклятсионии савдогарон равона шудааст.

Ҳамчунин, мақомоти Вазорати савдо дар якҷоягӣ бо дигар воҳидҳои мақомоти зиддиинҳисорӣ ваъда медиҳанд, ки назоратро пурзӯр гардонида, дар сурати вайрон намудани қонунгузории амалкунанда оид ба масъалаи савдо фавран чораҳои зарурӣ андешанд.

Dialog.tj