Президенти Ҷумҳурии Қазоқистон дар пайи шиддат гирифтани ҷанг байни Русия ва Украина дастур дод, ки амнияти иншооти низомӣ ва ғайринизомӣ фавран таъмин карда шавад.

Хабаргузориҳои Қазоқистон бо такя ба Берик Уалӣ, раиси Дафтари матбуоти президент хабар медиҳанд, ки Қосим-Жомарт Токаев дар робита ба шиддат гирифтани вазъ дар атрофи Украина ба мақомот дастур дод, ки чораҳои фаврии амниятӣ андешида шавад.

“Токаев ба сарвазир, роҳбари дастгоҳи президент, роҳбарони тамоми сохторҳои қудратӣ ва ҳокимон дастур дод, ки дар робита ба шиддат гирифтани вазъ дар атрофи Украина чораҳои таъҷилӣ андешанд, то амнияти объектҳои муҳимми ҳарбӣ ва ғайринизомиро таъмин намоянд” – навиштааст Берик Уалӣ дар саҳифаи худ дар шабакаи иҷтимоии X.

Раиси Дафтари матбуоти Қазоқистон таъкид кардааст, ки вазъият дар кишвар таҳти назорати шахсии президент қарор дорад: “Барои кишвари мо ҳадафи муҳимми стратегӣ  ҳифзи субот, оромӣ ва тартиботи ҳуқуқӣ аст. Қазоқистон  борҳо ҷонибдори ҳалли масъалаи поён додан ба ҷанг байни ду халқи славяниро бо роҳи музокира эълон кардааст”- меафзояд Берик Уалӣ.

Ёдовар мешавем, ки дар шабу рӯзи гузашта Украина бори аввал бо мушакҳои дурбурди истеҳсоли Амрико ва Англия ба дохили хоки Русия ҳамла кард. Дар пайи он Русия бори аввал бо мушаки баластикии фаросавт аз минтақаи ҳаммарз бо Қазоқистон ба Украина ҳамлаи ҷавобӣ намуд.

Dialog.tj