Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон, субҳи 14-уми август бо Умедҷон Носирзода, раиси ноҳияи Дарвоз, суҳбати телефонӣ анҷом додаанд.

Бино ба иттилои Дафтари матбуоти раиси ҷумҳур, дар ин суҳбат Эмомалӣ Раҳмон ба хонаводаи Жасмина Ятимзода, модари ҷавоне, ки рӯзи 13-уми август кушта шудааст, изҳори ҳамдардӣ кардаанд.

Раиси ҷумҳури Тоҷикистон ба масъулон дастур додаанд, ки ба хонаводаи Ятимзода кумаки моддию маънавӣ расонида шуда, раванди тарбияи кӯдаки хурдсоли ӯ зери назорат гирифта шавад.

Гуфта мешавад, Жасмина Ятимзода рӯзи 13-уми август бар асари тирпарронии силоҳбадастон аз ҷониби Афғонистон ба ҳалокат расидааст.

Дар иттилоияи расмӣ ҷузъиёти бештар дар бораи ҳувияти силоҳбадастон ва сабабҳои рух додани ин ҳодиса оварда нашудааст.

Мақомоти Тоҷикистон гуфтаанд, ки вобаста ба ин ҳодиса сохторҳои дахлдор тафтишотро оғоз кардаанд.

Dialog.tj