Президенти Ҷумҳурии Исломии Эрон Масъуд Пизишкиён, ки дар Донишгоҳи давлатии тиббии Тоҷикистон ба номи Абуалӣ ибни Сино суханронӣ мекард, таъкид намуд, аз ҷанг нафрат дорад ва бо кинаву душманӣ ба касе нигоҳ намекунад.

Масъуд Пизишкиён, ки дар ҷамъи устодону донишҷӯёни тоҷик суҳбат мекард, афзуд: “Ҳар касе, ки меҷангаду ҷангталаб аст, мушкиле дар мағзаш вуҷуд дорад”.

Президенти Эрон таъкид кард, ки бояд ба қишри осебпазири ҷомеа, ки имконоти маҳдуд доранд, таваҷҷуҳ шавад: “Касоне бештар дучори бемориву маргу мир мешаванд, ки фақиртар, бесаводтар, бекор, ятим ва бесарпарастанд”.

Масъуд Пизишкиён афзуд, ки тандурустӣ танҳо бо амали тиббӣ ба даст намеояд ва ниёзманди таваҷҷуҳ ба омилҳоест, ки қишрҳои заифи ҷомеаро таҳдид мекунад.

“Хатари фақр ятимон, дурафтодаҳо ва бесаводҳоро бештар таҳдид мекунад. Касоне, ки ошно ва дастрасӣ надоранд, бештар аз дигарон дар маърази хатар қарор мегиранд”- таъкид кард Масъуд Пизишкиён.

Президенти Ҷумҳурии Исломии Эрон таъкид кард, ки сиёсатгузорон ва масъулони соҳаи тандурустӣ бештар ба афроди бесарпаноҳ, фақир ва қишри осебпазири ҷомеа таваҷҷуҳ кунанд ва шароити беҳтару роҳаттар барои ин афрод фароҳам намоянд.

“Одаме, ки пул, ошно ва илм дорад, ба роҳатӣ метавонад ба ҷое, ки мехоҳад бирасад, вале мо бояд касонеро бибинем, ки маъмулан касе ба онҳо таваҷҷуҳ намекунад”- афзуд президенти Ҷумҳурии Исломии Эрон.

Масъуд Пизишкиён бо таъкид бар ин ки сиёсати Эрон ҷангталабона нест ва бо ҳеч кас даъво надорад, афзуд “Аз ҳар гуна ҷангу хушунат танаффур дорем. Ҳадафи ман ба унвони президент чизе ҷуз саломатӣ барои мардуми кишварам ва табобати мардумони ҷаҳон нест. Мо бо нигоҳи кина ва душманӣ ба касе нигоҳ намекунем ва ба дунболи ҳалли мушкилот ҳастем”.

Dialog.tj