Ҷей Вэнс, муовини Доналд Трамп, президенти Амрико дар пайи музокироти ғайримустақими миёни Теҳрон ва Вашингтон дар шаҳри Женеваи Швейтсария эълом кард: “Гуфтугӯҳо бо Эрон дар бархе ҷанбаҳо ба хубӣ пеш рафт”.

Муовини президенти Амрико рӯзи сешанбе (17-уми феврал) дар шабакаи “Фокс Нюз”, мутааллиқ ба ҷумҳурихоҳон афзуд, ки Трамп мехоҳад бо Эрон ба роҳҳалле бирасад.

Вэнс дар идома бо баёни ин, ки аз бархе ҷанбаҳо ҷаласа хуб пеш рафт, гуфт: “Аз ҷиҳати дигар, аммо комилан рӯшан буд, ки президент чанд шартҳое таъйин карда, ки эрониҳо ҳанӯз воқеан ҳозир нестанд онро бипазиранд ва дар борааш вориди раванди ҳалуфасл шаванд”.

Ин изҳороти Вэнс дар ҳоле буд, ки ӯ дар бораи ҷузъиёти шартҳои Трамп сухане нагуфт.

Ӯ ҳамчунин, бо такрори иддаоҳои Вашингтон муддаӣ шуд: “Авлавияти аслии мо ин аст, ки Эрон ба силоҳи ҳастаӣ даст пайдо накунад.”

Вэнс дар идомаи иддаоҳои Амрико афзуд: “Президент башиддат ба дунболи ёфтани роҳҳалле аст, чӣ аз тариқи гузинаҳои дипломотӣ ва чӣ гузинаҳои дигар ба ин маъно, ки эрониҳо натавонанд ба силоҳи ҳастаӣ даст пайдо кунанд”.

Даври дувуми музокироти ҳастаӣ миёни Эрон ва Иёлоти Муттаҳида дар шаҳри Женеваи Швейтсария рӯзи сешанбе, 17-уми феврал баргузор шуд ва пас аз ҳудуди се соату 30 дақиқа ин мулоқот поён ёфт.

Ин давр аз музокирот монанди даври қабл ба сурати ғайримустақим ва бо миёнҷигарии салтанати Умон баргузор шуд ва Сайид Аббос Ироқчӣ, вазири корҳои хориҷаи Ҷумҳурии Исломии Эрон риёсати ҳайати музокиракунандаи Эронро бар уҳда дошт ва Стив Уиткофф, намояндаи вижа ва Ҷаред Кушнер, домоди президенти Амрико риёсати ҳайати амрикоиро бар уҳда доштанд.

Dialog.tj