Президенти Иёлоти Муттаҳидаи Амрико Доналд Трамп гуфт, ки таҳримҳои нав бар зидди Русия ҳатман татбиқ хоҳанд шуд, навобаста аз он ки онҳо таъсир доранд ё на.

“Мо таҳримҳо ҷорӣ хоҳем кард. Намедонам, ки онҳо Путинро нороҳат хоҳанд кард ё на. Онҳо аз мавҷудияти ин таҳримҳо бохабаранд. Ман беҳтар аз ҳар кас таҳриму боҷ ва дигар механизмҳоро медонам. Вале намедонам, ки таъсире хоҳанд дошт ё на, аммо мо ин корро хоҳем кард”- гуфт Доналд Трамп.

Президенти Амрико таъкид кард, ки ҷанги Украина бояд оғоз намешуд ва сабаби сар задани он, ба гуфтаи ӯ, сиёсати нодрусти роҳбарони қаблӣ буд.

“Агар ман президент мебудам, ин ҷанг сар намезад. Ин ҷанги Байден аст, як ҷанги бемаънӣ, ки набояд вориди он мешудем”- гуфт Доналд Трамп.

Моҳи гузашта Доналд Трамп барои Владимир Путин муҳлати 50-рӯза муқаррар карда буд, то бо Украина ба созиш расад ва ба ҷанг поён диҳад. Ӯ гуфт, ки дар сурати иҷро нашудани ин шарти сулҳ боҷи 100 фоизӣ ба Русия ва шарикони тиҷоратии он эълон мекунад.

Ба гуфтаи мақомоти амрикоӣ ин муҳлат ахиран ба 10 то 12 рӯз коҳиш дода шудааст. Ҷон Келли, намояндаи муваққатии Иёлоти Муттаҳидаи Амрико дар Созмони Милали Муттаҳид гуфт, ки Доналд Трамп мехоҳад то 8-уми август миёни Русия ва Украина сулҳ ба даст ояд.

Дар ҳамин ҳол Кремл вокуниш нишон дода, гуфт, ки изҳороти Вашингтонро бо диққат пайгирӣ мекунад ва то расидан ба ҳадафҳои худ амалиёти низомӣ дар Украина идома хоҳад ёфт.

Dialog.tj