Президенти Иёлоти Муттаҳидаи Амрико Доналд Трамп гуфт, ки музокироти Амрико бо Эрон хуб пеш меравад ва бовар дорад, бо Эрон ба созиш марасад.

Президенти Амрико рӯзи 27 –уми апрел дар суҳбат бо расонаҳо гуфт: “Дар хусуси вазъияти Эрон фикр мекунам, ки шароит хеле хуб пеш меравад. Бовар дорам, ки як созиш ба даст хоҳад омад. Қариб, мутмаин ҳастам, ки иттифоқ меафтад. Мо бидуни ниёз ба бомбаборон ба созиш мерасем”.

Ёдовар мешавем, ки даври сеюми музокироти Амрико ва Эрон рӯзи шанбеи ҳафтаи гузашта дар Масқати Уммон баргузор гардид. Бар асоси гузориши рӯзномаи “Вол-стрит журнал” ду ҷониб дар ду масъалаи асосӣ – имкони ғанисозии ураниум дар Эрон ва ворид кардани Барномаи мушакии Эрон ба доираи музокирот ихтилофи назар доранд. Бо вуҷуди ихтилофҳо ҳайатҳои амрикоиву эронӣ қарор гузоштанд, ки дар ҳафтаи баъдӣ музокиротро идома диҳанд.

Сарвазири Исроил Бенямин Нетаняҳу, ки нигарони Барномаи ҳастаии Эрон аст, гуфт, ки созиши Амрико бо Эрон бояд боиси барҳам додани комили Барнома шавад. Ӯ афзуд, ки Барномаи мушакии Эрон низ бояд дар рӯйи мизи музокирот қарор гирад.

Ҷумҳурии Исломии Эрон борҳо мухолифати худро барои гуфтугӯ ба сари Барномаи мушакӣ эълон намуда, гуфтааст, ки ин масъалаи амнияти миллӣ аст.

Вазири корҳои хориҷии Ҷумҳурии Исломии Эрон баъди музокироти даври сеюм дар рӯзи шанбеи ҳафтаи гузашта гуфт: “Баъзе ихтилофоти мо хеле ҷиддӣ аст ва бархе дигар камтар, бархе печидагиҳои махсуси худро доранд. Мо, албатта, умедворем, ки ба зудӣ пеш меравем”.

Dialog.tj