Дар Маркази кӯдакон ва наврасони шаҳри Душанбе маросими ҷамъбаст ва ҷоизасупории ғолибони даври сеюм Озмуни ҷумҳуриявии «Шоҳномахонӣ» баргузор гардид.

Тавре ки маркази матбуоти Вазорати маориф ва илм хабар медиҳад, дар даври шаҳрӣ 36 нафар ғолибият ба даст оварда, ба даври чорум, яъне ҷумҳуриявӣ роҳхат гирифтанд.

Манбаъ навиштааст, ки 18 омӯзгори муассисаҳои таҳсилоти миёнаи умумии пойтахт, ки шогирдонашон дар даври сеюми озмун ғолибиятро ба даст оварданд, аз ҷониби Мақомоти иҷроияи ҳокимияти давлатии шаҳри Душанбе ҳавасманд гардонида шуданд.

Иттилоъ дода мешавад, ки дар даври якуми озмун дар шаҳри Душанбе 58 ҳазору 210 нафар иштирок намуда, аз ин шумора 6 ҳазору 453 нафар ба даври дуюм роҳхат гирифтанд. Дар даври дуюм, ки дар ноҳияҳои пойтахт баргузор гардид, 6 ҳазору 453 нафар иштирок намуда, дар натиҷаи рақобати солим ва арзёбии донишу маҳорати довталабон 155 нафар ба даври сеюм роҳ ёфтанд.

"Натиҷаҳои давраҳои озмун дар пойтахт нишон доданд, ки таваҷҷуҳ ба мутолиа ва омӯзиши «Шоҳнома» миёни хонандагону донишҷӯён, омӯзгорон, кормандони соҳаҳои гуногун ва аҳли зиё рӯ ба афзоиш дорад", - афзудааст манбаъ.

Dialog.tj