Маркази миллии тестии назди Президенти Ҷумҳурии Тоҷикистон хабар дод, ки ҳар намояндаи ВАО имкони боздид аз марказҳои имтиҳониро дорад, аммо шарт ин аст, ки ӯ бояд дархости хаттӣ пешниҳод кунад.

Гуфта мешавад, ки дархостдиҳӣ барои журналистон аллакай аз 26-уми июни соли 2025 оғоз шудааст.

“Тибқи банди 138-и “Тартиби гузаронидани имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии Ҷумҳурии Тоҷикистон”, ки бо қарори Ҳукумати Ҷумҳурии Тоҷикистон аз 29-уми апрели соли 2023, № 188 тасдиқ шудааст, ҳузури намояндагони ВАО, ки ба Марказ хаттӣ муроҷиат кардаанд, дар маркази имтиҳонӣ то оғози имтиҳон иҷозат дода мешавад” - зикр шудааст дар иттилоияи марказ.

Ёдовар мешавем, ки даври якум (асосӣ)-и имтиҳонҳо – қисмҳои А (имтиҳон дар заминаи таҳсилоти умумӣ) ва Б (имтиҳон дар заминаи таҳсилоти умумии асосӣ) аз 1-ум то 9-уми июл дар 47 маркази имтиҳонӣ доир мегардад. Марказҳои имтиҳонӣ барои даври якум дар заминаи муассисаҳои таълимии таҳсилоти миёнаи умумии 21 шаҳру ноҳияи интихобшудаи ҷумҳурӣ (Исмоили Сомонӣ, Сино, Фирдавсӣ, Шоҳмансур, Рашт, Турсунзода, Хуҷанд, Истаравшан, Исфара, Конибодом, Панҷакент, Бобоҷон Ғафуров, Бохтар, Кӯлоб, Восеъ, Данғара, Ёвон, Кӯшониён, Ҷалолиддини Балхӣ, Шаҳритус ва Хоруғ) ташкил карда мешаванд. Даври дуюми имтиҳонҳо – қисмҳои А ва Б рӯзи 13-уми июл дар марказҳои имтиҳоние, ки дар заминаи муассисаҳои таълимии таҳсилоти миёнаи умумии шаҳрҳои Душанбе, Хуҷанд, Панҷакент, Бохтар, Кӯлоб, ноҳияҳои Данғара ва Рашт ташкил карда мешаванд, баргузор мегардад.

Dialog.tj