Як манбаи покистонӣ бо хушбинӣ дар бораи имкони дастёбӣ ба тавофуқи марҳилаӣ байни Эрон ва Амрико эълом кард, ду кишвар бар афзоиши хостаҳояшон дар бораи ураниюми ғанишуда ва тангаи Ҳурмуз исрор доранд.

Ба гузориши “Ал-Ҷазира” ин манбаи покистонӣ таъкид кард, ки кишвараш ҳамчунон ба имкони дастёбӣ ба тавофуқи марҳилаӣ байни Вашингтон ва Теҳрон хушбин аст. Рӯзи гузашта Афнонуллоҳ Хон, сенатори покистонӣ бо ишора ба ин, ки Исломобод ба талоши худ барои дастёбии Теҳрон ва Вашингтон ба як тавофуқ идома медиҳад, таъкид кард: “Музокироти Эрон ва Амрико дар масири дурусте пеш меравад”.

Афнонуллоҳ Хон изҳор дошт: “Музокирот миёни Теҳрон ва Исломобод ва ҳамчунин, миёни Покистон ва Амрико идома дорад ва мо ҳар коре, ки битавонем анҷом медиҳем, то тарафҳоро ба мизи музокира нишинонем, ихтилофотро коҳиш диҳем, ба тавофуқ бирасем ва ҷангро мутаваққиф кунем”.

Вай ҳамчунин, бо баёни ин, ки пешрафтҳое дар музокирот миёни Эрон ва Иёлоти Муттаҳида низ ҳосил шудааст, афзуд: “Мо хушбин ҳастем, зеро муътақидем, ки ҳар ду тараф хостори ҳалли масъала ҳастанд. Ин сенатори покистонӣ дар идома таъкид кард: “Албатта вазъияте пеш омада буд, ки тасаввур мекардем авзоъ ба гунаи хосе поён меёбад, аммо чунин нашуд”.

Афнонуллоҳ Хон дар поён бо баёни ин ки Иёлоти Муттаҳида ҳудуди 90 дарсад аз захираҳои таслиҳотии худро масраф кардааст ва барои бозсозии онҳо ба се то панҷ сол ниёз дорад, хотирнишон кард: “Ин мавзуъ нишондиҳандаи он аст, ки Амрико тавоноии ҷангафрӯзии тӯлони‌муддатро надорад, чаро ки агар Иёлоти Муттаҳида тавоноии идомаи ҷангро дошт, Исроил барои азсаргирии даргириҳо ба Вашингтон фишор меовард”.

Рӯзи панҷшанбе низ Муҳаммад Мудассир Типу, сафири Покистон дар Эрон дар поёни маъмурияти худ дар паёме изҳори умедворӣ кард, ки талошҳои миёнҷигарии Исломобод миёни Теҳрон ва Вашингтон ба натиҷа бирасад.

Dialog.tj