Вазорати корҳои хориҷии Ӯзбекистон ба Вазорати корҳои хориҷии Русия нотаи расмӣ ирсол намудааст. Ин иқдом дар пайи нашри наворест, ки дар он як шаҳрванди Русия дар шаҳри Химки таксисти ӯзбекистониро бо суханони таҳқиромез ва дашномҳои қабеҳ озор медиҳад.

Ба гуфтаи сухангӯи Вазорати корҳои хориҷии Ӯзбекистон Аҳрор Бурҳонов нота бо талаби мушаххас кардани шахсияти марди таҳқиршуда ва андешидани чораҳои ҳуқуқӣ нисбат ба ӯ фиристода шудааст. Ӯ таъкид намуд, ки мақомоти Тошканд пайваста расонаҳо ва шабакаҳои иҷтимоиро назорат мекунанд ва дар ҳолати ошкор шудани чунин ҳолатҳо бо мақомоти марбутаи кишварҳои хориҷӣ ҳамкорӣ менамоянд.

“Ҳоло тафтиши ҳодисае идома дорад, ки дар моҳи август вокунишҳои зиёдеро дар ҷомеа ба бор овард. Дар робита ба он ба Вазоарти корҳои хориҷии Русия нотаи расмӣ фиристода шуд”- зикр кард Аҳрор Бурҳонов. Ба гуфтаи ӯ, шаҳрвандони Ӯзбекистон навобаста аз макони зист таҳти ҳимояи давлати худ қарор доранд.

Видеои ин низоъро рӯзи 27-уми август канали телеграми “РТР на русском” нашр кард. Дар навор марде дида мешавад, ки бо овози баланд ба таксисти ӯзбек дашном медиҳад ва ӯро “ғуломи русҳо” мехонад. Таксист, бо вуҷуди таҳқирҳо кӯшиш мекунад, оромиро ҳифз кунад, аз ронанда даъват кунад, суханҳои ноҷоро қатъ кунад.

Бар асоси иттилои шоҳидон муноқиша баар сари он сар зад, ки таксист дар даромадгоҳи ҳавлие истода буд ва ба мошини партовкаш роҳ намедод.

Шоми ҳамон рӯз 27-уми август дар канали расмии Аҳрор Бурҳонов ёдорварӣ шуд, ки шаҳрвандони Ӯзбекистон дар ҳар куҷое бошанд ҳам таҳти ҳимояи давлати худ қарор доранд ва дар сурати поймол шудани ҳуқуқ ва озодиҳояшон бояд ба намояндагиҳои дипломатии кишвар муроҷиат кунанд.

Dialog.tj