Президенти Ӯзбекистон Шавкат Мирзиёев зимни суханронӣ дар Форуми байналмилалии сармоягузории Тошканд ба зарурати таҳкими ҳамкориҳои иқтисодӣ ва дуҷонибаи судманди кишварҳои Осиёи Марказӣ таъкид намуда, афзуд, ки кишварҳои минтақа аз рақобат ба ҳамкории воқеӣ бояд гузаранд.

Президенти Ӯзбекистон Форуми Тошкандро минбари муҳим барои табодули афкор миёни сиёсатмадорон, коршиносон ва намояндагони созмонҳои байналмилалӣ номида, гуфт: “Имрӯз Осиёи Марказӣ дар маркази таваҷҷуҳи бозингарони ҷаҳонӣ қарор дорад. Аммо мо бояд аз имкониятҳои иқтисодии худ мустақилона ва оқилона истифода кунем”

Шавкат Мирзиёев бо зикри оморҳои ҷолиб таъкид намуд, ки ҳаҷми умумии иқтисодиёти кишварҳои Осиёи Марказӣ дар ҳафт соли ахир беш аз 40 фоиз афзуда, ба 4000 миллиард доллар расидааст. Ин рақам дар баробари рушди тиҷорат ва сармоягузорӣ афзоиш ёфтааст.

Ҳамзамон гардиши савдо миёни кишварҳои минтақа 3,5 баробар афзуда ва шумораи корхонаҳои муштарак 2,5 маротиба бештар шудааст. Шавкат Мирзиёев таъкид намуд, ки фақат дар соли 2023 гардиши савдои Ӯзбекистон бо кишварҳои ҳамсояи минтақавӣ қариб 8 миллиард долларро ташкил додааст.

Шавкат Мирзиёев бо ишора ба аҳамияти шабакаҳои нақлиётӣ, лоиҳаҳои роҳи оҳани “Чин-Қирғизистон-Ӯзбекистон” ва лоиҳаи Транс-афғон, ки Ӯзбекистонро бо Покистон ва бандарҳои баҳрии ҷанубӣ мепайвандад, гуфт: “Ин лоиҳаҳо барои дастрасии кишварҳои минтақа ба бозорҳои бузурги ҷаҳонӣ, махсусан Ҳиндустон, Покистон ва Ховари Миёна аҳамияти ҳалкунанда доранд”.

Президенти Ӯзбекистон пешниҳод кард, як стратегияи нави иқтисодии Осиёи Марказӣ барои даҳсолаи оянда таҳия гардад, ки самтҳои зеринро фаро гирад: истифодаи самараноки захираҳои об ва энергетика, тақвияти амнияти озуқаворӣ ва тавсеаи кишоварзӣ, гузариш ба “иқтисоди сабз” ва истифодаи манбаъҳои барқароршаванда, ҳифзи муҳити зист ва мубориза бо оқибатҳои тағйирёбии иқлим.

Шавкат Мирзиёев бо лаҳни мусбат аз кишварҳои минтақа даъват кард, ки “аз рақобат ба ҳамкории воқеӣ” гузаранд. Ӯ ташкили бунёди умумии сармоягузорӣ, механизми машваратии доимӣ ва маркази таҳлилию иқтисодии минтақавиро пешниҳод намуд, ки барои таҳкими ҳамгироӣ дар Осиёи Марказӣ мусоидат хоҳад кард.

Dialog.tj