Шавкат Мирзиёев, президенти Ӯзбекистон пешниҳод кард, ки шаҳри нави Андиҷон ба номи Заҳириддин Муҳаммад Бобур номгузорӣ шавад. Ӯ гуфтааст, ки ин шаҳр мисли шаҳри Навоӣ пуле миёни таърих ва оянда хоҳад буд. Пешниҳоди президентро рӯзи 15-уми апрел мардуми вилояти Андиҷон ба хушӣ истиқбол намудаанд. Дар ин хусус расонаҳои ӯзбекистонӣ хабар медиҳанд.

“Бобур Мирзо идомадиҳандаи арзандаи эҳёи Темуриён - шахсияти бузургу фархунда, пуштибони илм, фарҳанг, санъат ва адабиёт, истеъдоди инсонӣ мебошад. Мероси нотакрори ӯ халқи моро дар ҷаҳон машҳур гардонд. Сохтмони як шаҳр бо номи ӯ амалӣ гардидани орзуи аҷдоди бузургамонро ба таври рамзӣ ифода мекунад” – таъкид кард президенти Ӯзбекистон Шавкат Мирзиёев.

Бар асоси нақша, дар шаҳри нав як маҷмаи бузурги таълимӣ сохта мешавад, ки кӯдакистонҳо, мактабҳо, донишгоҳ, осорхона, китобхона ва боғи технологии IT –ро дар бар хоҳад гирифт.  Дар дохили донишгоҳ маҷмааи варзишии муосир бо меъёрҳои байналмилалӣ низ пешбинӣ гардидааст.

Расонаҳои ӯзбекистонӣ менависанд, шаҳри Бобур ба маркази маънавӣ табдил хоҳад ёфт, ки арзишҳои миллиро инъикос намуда, сарчашмаи илҳом барои ҷавонон, маркази нави сайёҳӣ ва фарҳангӣ, ҳамчунин, як “шаҳри оқил” бо технологияҳои пешрафта хоҳад шуд.

Дар баландтарин нуқтаи боғ ҳайкали Муҳаммади Бобур гузошта хоҳад шуд. Барои иҷрои барномаҳои сохтмонии мазкур 250 миллион доллар сармоягузорӣ сурат хоҳад гирифт.

“Тавре маълум аст, новобаста аз он ки Заҳириддини Муҳаммади Бобур дар кадом нуқтаи дунё ва кадом кишвар қарор дошт, тамоми умри худро бо ёди Ватан ва орзуи бозгашт сипарӣ кард. Ман фикр мекунам, ки имрӯз орзуи аҷдоди бузурги мо ҷомеаи амал пӯшид ва гӯё ӯ дубора ба Ватан баргашт. Ҳамагонро бо ин рӯйдоди таърихӣ табрик мегӯям” – гуфт Шакват Мирзиёев.

Dialog.tj