Дар таҳқиқоти нави Бонки ҷаҳонӣ дар хусуси муҳоҷират таъкид мегардад, ки шумораи шаҳрвандони Ӯзбекистон, ки Русияро барои муҳоҷират интихоб мекунанд, 57% коҳиш ёфтааст. Бонки ҷаҳонӣ дар гузориши нав мегӯяд, дар сурати маблағ нафиристодани муҳоҷирон аз хориҷ, сатҳи камбизоатӣ дар Ӯзбекистон метавонад аз 9,6% то 16% афзоиш меёбад.

Гузориши нави Бонки ҷаҳонӣ таҳлили тамоюлҳои муҳоҷират, мушкилот ва имкониятҳо дар минтақаи Аврупо ва Осиёи Марказиро дар бар мегирад.

Дар ҷараёни муаррифии гузориши Бонки ҷаҳонӣ оид ба масъалаҳои муҳоҷират намояндагони мақомоти масъул дар соҳаи муҳоҷират аз Тоҷикистон, Ӯзбекистон, Қазоқистон ва Қирғизистон ширкат доштаанд.

Дар ин гузориш зикр мешавад, ки муҳоҷират дар минтақаи Осиёи Марказӣ яке аз мушкилоти асосии рушд боқӣ мемонад. Дар ин минтақа 100 миллион муҳоҷир зиндагӣ мекунанд, ки ин сеяки шумораи муҳоҷирони ҷаҳонро ташкил медиҳад. Набудани даромад, ноустувории демографӣ, тағйирёбии иқлим ва низоъҳои мусаллаҳона ба афзоиши муҳоҷират мусоидат мекунад.

Дар гузориш омадааст, ки то соли 2023 беш аз 80% муҳоҷирони меҳнатӣ аз Тоҷикистон ва Қирғизистон ба Русия барои кор рафтаанд. Муҳоҷирати меҳнатӣ аз Ӯзбекистон ба хориҷ гуногун шудааст. Бар асоси омор 57% дар Русия, 15% дар Қазоқистон ва 10% дар Украина кор мекунанд.

Гуфта мешавад, ки муҳоҷирати меҳнатӣ дар кишварҳои Осиёи Марказӣ яке аз сарчашмаҳои асосии даромади миллионҳо шаҳрванд ба ҳисоб меравад. Дар соли 2024 фиристодани маблағи муҳоҷирони меҳнатӣ 45% маҷмуи маҳсулоти дохилии Тоҷикистон, 24% маҷмуи маҳсулоти дохилии Қирғизистон ва 14% маҷмуи маҳсулоти дохилии Ӯзбекистонро ташкил додааст.

Dialog.tj