Фардо, 16-уми декабр дар шаҳри Душанбе  Рӯзҳои фарҳанги Давлати Қатар оғоз мегардад. Дар ин бора, Вазорати фарҳанги Ҷумҳурии Тоҷикистон хабар додааст. Ифтитоҳи чорабиниҳо рӯзи 16-уми октябр, соати 18:00 дар бинои Театри давлатии академии опера ва балети ба номи С. Айнӣ оғоз ёфта, то 18-уми октябр идома меёбад.

Дар ин рӯз ҳамчунин, дидори вазири фарҳанги Ҷумҳурии Тоҷикистон Матлубахон Сатториён бо вазири фарҳанги Давлати Қатар Шайх Абдураҳмон ибни Ҳамад Оли Сонӣ дар Китобхонаи миллии Тоҷикистон багузор мегардад, ки дар он ҳамкориҳои фарҳангии ду кишвар мавриди баррасӣ қарор мегиранд.

Чорабиниҳои фарҳангӣ ҳамарӯза аз соати 17:30 то 22:00-и шаб идома ёфта, шомили  намоишҳои санъатӣ-анъанавии Қатар, намоиши филмҳо аз Бунёди филмҳои “Давҳа-филм”, консерти сарояндаи машҳури Давлати Қатар Мансур Ал-Маҳандӣ, намоиши хӯрокҳои миллӣ ва ҳинобандӣ ва хаймаи қабули меҳмонон мебошад.

Дар ин миён ҳайати меҳмонони давлати Қатар, ки ҳудуди сад нафарро ташкил медиҳанд аз мавзеъҳои зебои Тоҷикистон ба мисли НБО “Норак”, Майдони “Истиқлол”, Масҷиди ҷомеи марказии шаҳри Душанбе ба номи “Имоми Аъзам - Абуҳанифа Нуъмон ибни Собит” ва Маркази хизматрасонии “Дунёи ош” дидан менамоянд.

Мавриди зикр аст, ки ин чорабинии мазкур бахшида ба 30-солагии ҳамкориҳои дипломатии ду кишвари ба ҳам дӯст баргузор карда мешавад.