Дар шаҳри Душанбе филми “Қиморбоз”-и коргардони эронӣ Муҳсин Баҳорӣ дар доираи ҷашнвораи сеюми миллии синамои “Тоҷи Сомон” намоиш дода мешавад.

Намоиши филми “Қиморбоз” дар доираи барномаи “Рӯзи синамои Эрон” баргузор мешавад. Филми мазкурро Бунёди синамои Форобӣ таҳия карда ва Саъҷод Насруллоҳи Насаб продюсери он аст.

Бар асоси гузориши расонаҳои эронӣ дар доираи ҷашнвораи “Тоҷи Сомон” ҳар сол филмҳои истеҳсоли Эрон муаррифӣ карда мешавад. Ҳадафи ин иқдом густариш додани ҳамкориҳои фарҳангиву ҳунарӣ ва фароҳам намудани замина барои ошноии тамошобинон бо дастовардҳои синамои кишварҳои дигар мебошад.

Филми “Қиморбоз” қаблан дар чандин чорабиниҳои байналмилалӣ низ намоиш дода шуд ва сазовори ҷоизаҳо низ гардидааст. Ин филм дар ҷашнвораи байналмилалии “Он сӯйи кӯл” дар Македонияи Шимолӣ ҷоизаи махсуси ҳайати доваронро гирифт.

Ҳунарпешаи Эронӣ Шабнам Қурбонӣ, ки дар ин филм нақш офаридааст, дар ҷашнвораи филмҳои Созмони ҳамкории Шанхай дар Бишкек ҷоизаи “Турнаи тилоӣ”-ро гирифт.

Соли гузашта, дар даври дуюми ҷашнвораи “Тоҷи Сомон” филми “Шаҳсавор”, ки коргардонаш Ҳусейн Намозӣ аст, дар қисмати озмун намоиш дода шуд.

Ҳар сол дар доираи ҷашнвораи “Тоҷи Сомон” дар шаҳри Душанбе “Рӯзи синамои Эрон” баргузор мешавад. Имсол “Рӯзи синамои Эрон” аз 15 то 20-уми октябр дар шаҳри Душанбе доир хоҳад шуд.

Dialog.tj