Дидори намояндагони Украина, Аврупо ва Амрико дар Флорида тақрибан 6 соат идома ёфт. Қисми зиёди он ба баррасии масъалаҳои асосии созиши сулҳи эҳтимолӣ, аз ҷумла ояндаи қаламравҳои мавриди баҳс ва имкони узвияти Украина дар Иттиҳоди Аврупо бахшида шудааст.

Дар ин дидор мушовирони амнияти миллии роҳбарони Британия, Олмон ва Фаронса, ҳамчунин, намояндагони баландпояи Иттиҳоди Аврупо ва НАТО ширкат доштаанд.

Бо вуҷуди ин, тасмими Вашингтон дар хусуси сабук кардани маҳдудиятҳо ба сӯзишвории Русия ба мавзуи асосии баҳс табдил ёфт. Владимир Зелинский ин иқдомро “қарори заиф” номид.

Ин тасмими Доналд Трамп дар Амрико низ ба мухолифат дучор шуд. Шаш сенатор аз Ҳизби ҷумҳурихоҳ ва Ҳизби димократ дар изҳороти муштарак ҳушдор доданд, ки сабук кардани маҳдудиятҳо метавонад ба даромади Русия ва маблағгузории ҷанг ба Украина мусоидат кунад. Онҳо аз маъмурияти Доналд Трамп талаб намуданд, ки аз ин қарорро бознигарӣ кунад ва ба Маскав имконияти бештари молиявӣ надиҳад.

Музокироти Вашингтон бо Маскав то куҷо пеш рафт?

Нигаронии кишварҳои ғарбӣ баъд аз он бештар шуд, ки мақомоти онҳо дар хусуси миқёси тамосҳои Амрико бо Русия иттилооти нав гирифтаанд. Рӯзномаи “Ню-Йорк Таймз” навишт, Борн Зайберт, яке аз мақомоти баландпояи Иттиҳоди Аврупо, рӯзи якшанбе сафирони 27 кишвари узви ин иттиҳодро аз натиҷаҳои мулоқоти Флорида огоҳ намудааст.

Тибқи иттилои сарчашмаҳои ғарбӣ, намояндагони Аврупо аз эълони қарори ҳукумати Доналд Трамп дар хусуси сӯзишвории Русия пешакӣ огоҳ набудаанд. Ин хабар ҳатто сафирони кишварҳои узви Иттиҳоди Аврупоро ба ҳайрат овардааст.

Зайберт бар асоси иттилои сарчашмаҳои огоҳ, ба сафирон гуфт, ки яке аз хулосаҳои муҳимми мулоқот ин аст, ки мақомоти амрикоӣ бо Русия бештар аз он чи дар изҳороти оммавӣ нишон медиҳанд, дар тамос мебошанд. Вале ҷузъиёти бештари ин тамосҳо ошкор нашудааст.

Ҳукумати Доналд Трамп чунин мешуморад, ки ҳамкорӣ бо Маскав дар бахши энергетика метавонад ҳамзамон ду ҳадаф дошта бошад: коҳиш додани нархи сӯзишворӣ ва фароҳам намудани замина барои роҳи ҳалли сиёсӣ.

Аз нигоҳи Вашингтон сабук кардани баъзе маҳдудиятҳои иқтисодӣ метавонад ба Кремл нишон диҳад, ки дар сурати гузашт кардан дар масъалаи Украина имконияти барқарор намудани робитаҳои иқтисодӣ бо ҷаҳон вуҷуд дорад.

Буҳрони ахир нишон медиҳад, ки миёни ҳадафҳои Трамп, коҳиш додани нархи сӯзишворӣ ва расидан ба созиш бо Русия ва талошҳои Украина барои нигоҳ доштани фишор ба Маскав ихтилофи ҷиддӣ вуҷуд дорад. Ояндаи музокирот аз он вобаста хоҳад буд, ки оё Вашингтон метавонад барои поён додан ба ҷанг шароити қобили қабул барои Киев ва шарикони аврупоии он фароҳам созад ё на.

Dialog.tj