Муассисаи давлатии коммуналии «Душанбенақлиётхадамотрасон» бо нашри иттилоияе хабар дод, ки муовини раиси шаҳри Душанбе Раҳмидин Саломзода вазъи хизматрасонӣ, тозагӣ ва ҳолати санитарии воситаҳои нақлиёти мусофирбарро дар шабакаи хатсайрҳои шаҳр мавриди санҷиш қарор дод.

Манбаъ навиштааст, ки аз ҷониби муовини раиси шаҳри Душанбе ва директори «Душанбенақлиётхадамотрасон» ҳолати техникии воситаҳои нақлиёт, тозагии дохилу беруни автобусу троллейбусҳо, сатҳу сифати хизматрасонӣ ба мусофирон, коршоямии мониторҳои дохили салони автобусу троллейбусҳо, камераҳои мушоҳидавӣ ва фаъолияти низоми назорати дохили воситаҳои нақлиёт санҷида шуд.

“Дар ҷараёни санҷиш ба риояи одоби муошират ва муносибати хушмуомилаю эҳтиромонаи ронандагон бо мусофирон низ таваҷҷуҳи ҷиддӣ зоҳир гардид. Таъкид шуд, ки ронандагон бояд ҳангоми иҷрои вазифаҳои хизматӣ қоидаҳои муоширати фарҳангиро риоя намуда, ба мусофирон дар сатҳи баланд хизматрасонӣ намоянд”, - омадааст дар иттилоия.

Иттилоъ дода мешавад, ки Раҳмидин Саломзода оид ба беҳтар намудани хизматрасонии нақлиётӣ ва таъмини тозагии воситаҳои нақлиёт ба масъулон супоришҳои мушаххас дода, иброз намуд, ки камбудиҳои ҷойдошта фавран бартараф карда шуда, ҳамарӯза қисматҳои дохилӣ ва берунии воситаҳои нақлиёт тибқи талаботи муқарраргардида шуста ва тоза карда шаванд.

Dialog.tj