Доналд Трамп, раиси ҷумҳури ИМА, бо нигаронӣ аз эҳтимоли дахолат ва ҳамлаи бозигарони хориҷӣ ба шабакаи барқи кишвараш, фармони иҷроӣ содир карда, «вазъи фавқулодаи миллӣ» эълом кардааст.

Кохи Сафед рӯзи чоршанбе, 26-уми август, гуфт, ки ҳадафи ин тасмим ҳифзи шабакаи барқи ИМА аз таҳдидҳои хориҷӣ ва коҳиш додани вобастагии ин кишвар ба таҷҳизоти истеҳсолшуда дар хориҷ аст.

Тибқи фармони Трамп, бархе кишварҳо ва ширкатҳои хориҷӣ метавонанд аз осебпазирии шабакаи барқи ИМА истифода кунанд. Ба гуфтаи мақомоти амрикоӣ, ин масъала муҳим аст, зеро шабакаи барқ на танҳо хонаҳо ва корхонаҳо, балки артиш, хадамоти изтирорӣ, бемористонҳо ва дигар зерсохторҳои муҳимро низ бо неру таъмин мекунад.

Чаро Вашингтон нигарон аст?

Дар солҳои охир вобастагии ИМА ба таҷҳизоти хориҷӣ дар шабакаи барқ бештар шудааст. Ҳамзамон, талабот ба неруи барқ бо рушди марказҳои иттилоотӣ, ҳуши маснуъӣ ва саноатҳои пешрафта босуръат меафзояд.

Мақомоти амрикоӣ махсусан аз таҷҳизоти истеҳсолшуда дар Чин нигаронанд.

«Ройтерз» қаблан хабар дода буд, ки коршиносони амрикоӣ соли гузашта дар баъзе инвертерҳои офтобии сохти Чин таҷҳизоти иртиботии ношинос пайдо кардаанд. Ба гуфтаи ин манбаъ, мавҷудияти ин таҷҳизот дар ҳуҷҷатҳои маҳсулот зикр нашуда буд.

Таҷҳизоти хатарнокро берун мекунанд

Фармони нави Трамп ба Вазорати энергетикаи ИМА имкон медиҳад, ки таҷҳизоти хориҷиеро, ки барои шабакаи барқ хатарнок арзёбӣ мешаванд, муайян кунад.

Дар сурати зарурӣ, чунин таҷҳизотҳо аз шабака ҷудо карда шуда, ба назорат гирифта, иваз ё пурра бардошта мешаванд.

Маҳдудиятҳо танҳо ба таҷҳизоти барқӣ дахл надоранд. Компютер, хизматрасониҳои рақамӣ ва системаҳои дастрасии фосилавӣ, ки бо ин таҷҳизот алоқаманданд, низ метавонанд ба маҳдудиятҳо ворид шаванд.

Бо вуҷуди ин, Вазорати энергетика бояд пеш аз хориҷ ё иваз кардани таҷҳизоти мавҷуда муайян кунад, ки ин иқдом ба кори муътадили шабака ва таъмини барқи хадамоти муҳим зарар намерасонад.

«Аввал Амрико»

Трамп ҳамчунин, дастур додааст, ки қоидаҳои хариди давлатии таҷҳизоти марбут ба энержӣ тағйир дода шаванд. Ҳадаф ин аст, ки дар харидҳои давлатӣ ба таҷҳизот ва зерсохторҳои истеҳсоли дохилии ИМА афзалият дода шавад.

Вазорати энержии ИМА бояд дар муддати 180 рӯз пешниҳодҳои худро барои тағйири қоидаҳои хариди давлатӣ пешниҳод кунад.

Кохи Сафед мегӯяд, ин чораҳо барои он андешида шудаанд, ки шабакаи барқи Амрико аз ҳамла ва дахолати эҳтимолии хориҷӣ эмин нигоҳ дошта шуда, вобастагии кишвар ба таҷҳизоти хориҷӣ коҳиш дода шавад.

Ин тасмим дар замоне гирифта шудааст, ки ИМА ба неруи бештари барқ ниёз пайдо мекунад. Афзоиши истифодаи ҳуши маснуъӣ, сохтмони марказҳои бузурги иттилоот ва рушди саноатҳои нав талабот ба неруи барқро боло бурдааст. Аз ин рӯ, Вашингтон ҳифзи шабакаи барқро на танҳо масъалаи иқтисодӣ, балки як масъалаи амнияти миллӣ медонад.

Dialog.tj