Скотт Бессант, вазири молияи Амрико гуфтааст, Вашингтон субҳи имрӯз «бузургтарин ҳамлаи иқтисодӣ» бар зидди Эронро оғоз хоҳад кард. Ӯ иддао кардааст, ки ин иқдом аз ҳама гуна амалиёти қаблии иқтисодии ИМА дар таърих бузургтар хоҳад буд.

Ба гуфтаи вазири молияи ИМА ҳадафи ин сиёсат маҳдуд кардани «шоҳрагҳои ҳаётан муҳимми иқтисодӣ»-и Эрон ва афзоиши фишор ба Теҳрон мебошад. Бессант ҳамчунин, ба кишварҳое, ки ба гуфтаи ӯ, сарнавишти иқтисодии худро ба Эрон пайванд медиҳанд, ҳушдор додааст. Ӯ гуфта, чунин кишварҳо метавонанд бо маҳдуд шудани имкониятҳои дастрасӣ ба роҳҳои рушди устувор рӯбарӯ шаванд.

Вазири молияи ИМА иддао кардааст, ки Вашингтон мехоҳад ҳар як роҳи муҳимми иқтисодиеро, ки ба идомаи фаъолияти низоми Эрон мусоидат мекунад, маҳдуд созад.

Бессант ҳамчунин, ҳушдор додааст, ки агар ба неруҳои амрикоӣ ё кишварҳои минтақаи Халиҷи Форс амалиёти низомӣ сурат гирад, президенти ИМА Доналд Трамп ба он «зуд ва қотеъона» посух хоҳад дод.

Ин изҳорот дар ҳолест, ки дар Эрон вокунишҳои шадид ба фишорҳои иқтисодии ИМА садо медиҳанд.

Муҳсин Ризоӣ, дабири Шурои олии амнияти миллии Эрон, дар яке аз шабакаҳои иҷтимоӣ навиштааст, ки агар «ҷанги иқтисодӣ» идома ёбад, Эрон ҳатто як қатра нафт ҳам содир нахоҳад кард. Ба гуфтаи ӯ, содироти нафт дар ин ҳолат на аз тариқи тангаи Ҳурмуз ва на аз дигар роҳҳои Халиҷи Форс сурат нахоҳад гирифт.

Муҳсин Ризоӣ ҳамчунин, ҳушдор додааст, ки Теҳрон ҳар гуна иштирок ё дастгирии кишварҳои дигар аз «ҷанги иқтисодии ИМА алайҳи мардуми Эрон»-ро ҳамчун амали ҷангӣ арзёбӣ хоҳад кард.

Dialog.tj