Футболбози тоҷик Алишер Раҳимов метавонад фаъолияти худро дар дастаи медиавии Русия «БроукБойз» идома диҳад. Клуб ба бозигар барои бозгашт пешниҳод фиристодааст.

Райзен, яке аз роҳбарони «БроукБойз» гуфт, ки Алишер Раҳимов ба ин пешниҳод таваҷҷуҳ дорад. Бо вуҷуди ин, футболбоз қабл аз қабули қарор бояд бо мушовири худ машварат кунад.

«Мо ба Алишер Раҳимов пешниҳод кардем. Ӯ ба он таваҷҷуҳ дорад, вале мехоҳад пеш аз тасмим бо мушовираш суҳбат кунад», — гуфт Райзен.

Тибқи гуфтаи  ӯ, эҳтимоли бозгашти Алишер Раҳимов ба «БроукБойз» вуҷуд дорад. Футболбози тоҷик ҳоло дар Маскав қарор дошта, тамрин мекунад.

Алишер Раҳимов қаблан дар ҳайати «БроукБойз» -и Русия дар WINLINE Медиалига баромад карда буд. Ӯ дар мавсими панҷум бо даста ба унвони ноиб-қаҳрамон расид ва дар мавсими шашум қаҳрамони мусобиқа шуд. Пеш аз ин футболбоз барои «Амкал» низ бозӣ кардааст.

Моҳи феврали соли 2025 Алишер Раҳимов «БроукБойз»-ро тарк карда, барои идомаи фаъолияти касбӣ ба футболи Беларус ва Тоҷикистон рафт. Дар чемпионати Беларус ӯ барои «Сморгон» 9 бозӣ анҷом дода, як гол зад. Дар ҳайати «Нафтан» бошад, 15 бозӣ карда, чор гол ба самар расонд.

Дар чемпионати Тоҷикистон Алишер Раҳимов дар «Равшан»-и Кӯлоб ҳашт вохӯрӣ гузаронида, як партофти головар анҷом додааст.

Ҳоло бозгашти Алишер Раҳимов ба «БроукБойз» ниҳоӣ нашудааст. Қарори футболбоз пас аз машварат бо мушовираш ва баррасии пешниҳодҳои эҳтимолӣ аз клубҳои футболи касбӣ маълум хоҳад шуд.

Dialog.tj