19-уми август дар доираи татбиқи Лоиҳаи «Хизматрасониҳои маҷмӯӣ барои модар ва кӯдак» маросими тақдими 18 адад нақлиёти ёрии тиббӣ ба ноҳияҳои таҷрибавии лоиҳа Рашт, Файзобод, Шамсиддин Шоҳин, Дарвоз, Данғара ва Айнӣ баргузор гардид.

Тавре ки маркази матбуоти Вазорати тандурустӣ хабар додааст, дар чорабинӣ муовини вазири тандурустӣ ва ҳифзи иҷтимоии аҳолии Ҷумҳурии Тоҷикистон Зулфия Абдусаматзода, директори минтақавии Осиёи Марказӣ ва Ғарбии Раёсати рушди захираҳои инсонӣ ва иҷтимоии Бонки Осиёии Рушд София Шакил, директори Намояндагии Бонки Осиёии Рушд дар Ҷумҳурии Тоҷикистон Ко Сакамото, инчунин, намояндагони Вазорати тандурустӣ ва ҳифзи иҷтимоии аҳолӣ ва сартабибони беморхонаҳои марказии ноҳияҳои таҷрибавии лоиҳа иштирок намуданд.

Гуфта мешавад, ки Лоиҳаи «Хизматрасониҳои маҷмӯӣ барои модар ва кӯдак» ва лоиҳаи маблағгузории иловагӣ дар раванди татбиқи он дар рушду нумуи соҳаи тандурустии мамлакат, хусусан дар ноҳияҳои таҷрибавии Рашт, Файзобод, Шамсиддин Шоҳин, Данғара, Дарвоз ва Айнӣ, нақши калидӣ доранд.

Манбаъ меафзояд, ки Лоиҳаи «Хизматрасониҳои маҷмӯӣ барои модар ва кӯдак» дар доираи ҳамкориҳои судманди Ҳукумати Ҷумҳурии Тоҷикистон ва Бонки Осиёии Рушд бо мақсади таъмини хизматрасонии босифати тиббӣ ба аҳолӣ, хусусан модарону кӯдакон, дар ноҳияҳои Рашт, Файзобод, Шамсиддин Шоҳин, Данғара, Дарвоз ва Айнӣ татбиқ гардидааст.

Dialog.tj