Дар доираи сафари кории Президенти Ҷумҳурии Тоҷикистон муҳтарам Эмомалӣ Раҳмон ба шаҳри Ҳисор ба 40 кӯдаки ятими кулл туҳфаҳои Сарвари давлат супорида шуданд.

Бинобар иттилои Маркази матбуоти Вазорати маориф ва илми Ҷумҳурии Тоҷикистон, муовини сарвазири Ҷумҳурии Тоҷикистон Дилрабо Мансурӣ, вазири маориф ва илми Ҷумҳурии Тоҷикистон Раҳим Саидзода, раиси шаҳри Ҳисор Ҷаббор Носирзода ва дигар шахсони масъул бо ятимон вохӯриву суҳбат намуданд.

“Муовини Сарвазири Ҷумҳурии Тоҷикистон Дилрабо Мансурӣ зимни суҳбати самимӣ бо кӯдакон аз ғамхориҳои пайвастаи давлат ва Ҳукумати Ҷумҳурии Тоҷикистон нисбат ба ятимону бепарасторон ёдовар шуда, таъкид намуд, ки фароҳам овардани шароити мусоид барои таҳсил, тарбия ва рушди ҳамаҷонибаи онҳо аз вазифаҳои муҳими сохторҳои дахлдор ба ҳисоб меравад”, навиштааст манбаъ.

Дар вохӯрӣ бо ятимон Раҳим Саидзода, вазири маориф ва илм иброз дошт, ки ғамхорӣ нисбат ба ятимону бепарасторон ва фароҳам сохтани шароити муносиб барои таҳсилу тарбияи онҳо яке аз масъалаҳои муҳими сиёсати давлатӣ дар соҳаи маориф ба шумор меравад. Таъкид шуд, ки Вазорати маориф ва илми Ҷумҳурии Тоҷикистон дар доираи дастуру супоришҳои Пешвои миллат ҷиҳати ба таҳсил фаро гирифтани кӯдакони ятиму бепарастор, муҳайё намудани шароити мусоиди таълимӣ, ҳифзи ҳуқуқу манфиатҳои онҳо ва дастгирии минбаъдаи хатмкунандагони чунин гурӯҳҳо тадбирҳои заруриро амалӣ менамояд.

Dialog.tj