Сироҷиддин Муҳриддин, вазири корҳои хориҷии Ҷумҳурии Тоҷикистон, бо Марко Рубио, котиби давлатии Иёлоти Муттаҳидаи Амрико, дар шаҳри Вашингтон дидору гуфтугӯ кардааст.

Вазорати корҳои хориҷии Ҷумҳурии Тоҷикистон аз баргузории ин дидор дар 30-уми июн хабар додааст. Гуфта мешавад, ки дар ҷараёни ин мулоқот ҷонибҳо вазъ ва дурнамои рушди муносибатҳои Тоҷикистону Амрикоро баррасӣ намуда, бар алоқамандии худ ба таҳкими минбаъдаи шарикии дуҷониба бар пояи эҳтироми мутақобила ва ҳамкории дарозмуддату судманд таъкид кардаанд.

Дар ин дидор масъалаҳои густариши ҳамкориҳои тиҷоративу иқтисодӣ ва сармоягузорӣ низ мавриди баррасӣ қарор гирифта, ҷонибҳо роҳҳои афзоиши ҳаҷми гардиши савдои мутақобила, беҳтар намудани фазои сармоягузорӣ ва ҷалби ширкатҳои амрикоиро ба лоиҳаҳои бахшҳои афзалиятноки иқтисоди Тоҷикистон баррасӣ карданд.

Ҳамчунин, имкониятҳои тавсеаи ҳамкорӣ дар соҳаҳои саноат, энергетика, зерсохтори нақлиётӣ ва иқтисоди рақамӣ мавриди таъкид қарор гирифтааст.

Сироҷиддин Муҳриддин ва Марко Рубио ҳамчунин, дар бораи масъалаҳои амнияти минтақаӣ мубодилаи афкор намуда, омодагии худро барои идомаи ҳамкориҳо дар мубориза бо ифротгароӣ, терроризм ва ҷиноятҳои фаромиллӣ, инчунин, таҳкими субот ва рушди устувори Осиёи Марказӣ таъкид кардаанд.

Dialog.tj