Раҷаб Тайиб Эрдуғон, раисҷумҳури Туркия, мегӯяд нишасти сарони НАТО, ки қарор аст дар Анқара баргузор шавад, ба “қавитарин бистар барои табодули таҷриба” миёни аъзои ин эътилоф табдил хоҳад шуд.

Эрдуғон рӯзи душанбе, 29-уми июн, дар зиёфате ба ифтихори раисони парлумонҳои кишварҳои узви НАТО дар Истанбул гуфтааст, ки Туркия таҷрибаи густардаи худро дар чаҳорчӯби НАТО ва тавоноии мудирияти буҳронҳои минтақаиро дар ихтиёри муттаҳидонаш қарор медиҳад.

Ӯ афзудааст, ки Туркия дар ҳоли афзоиши буҷаи дифоии худ аст ва дар ҳоли ҳозир дар миёни панҷ кишвари нахусти иштироккунанда дар маъмуриятҳо ва амалиёти НАТО қарор дорад.

Раиси ҷумҳури Туркия таъкид кардааст, ки ҳифзи боздорандагии НАТО ва тақвияти ҳамбастагӣ миёни аъзо дар шароити кунунӣ аҳамияти бештаре пайдо кардааст.

Эрдуғон ҳамчунин, хостори эҷоди як шабакаи амниятӣ ва дифоӣ дар саросари НАТО шудааст, ки ба гуфтаи ӯ аз “Техас то Анқара”-ро дар бар гирад.

Ӯ дар бахши дигари суханонаш гуфтааст, ки ҷанги Украина бояд аз роҳи гуфтугӯ поён ёбад ва бар зарурати дастёбӣ ба натиҷа дар ин замина таъкид кардааст.

Эрдуғон ҳамчунин, таъкид кардааст, то замоне, ки “ишғоли заминҳои Фаластин” идома дошта бошад, дастёбӣ ба сулҳи пойдор дар Ховари Миёна мумкин нахоҳад буд.

Dialog.tj