17-уми апрел дар Маскав Сироҷиддин Муҳриддин, вазири корҳои хориҷии Ҷумҳурии Тоҷикистон дар вохӯрии нуҳуми вазирони корҳои хориҷӣ дар қолаби «Осиёи Марказӣ – Россия» иштирок кард.

Тавре ки маркази матбуоти Вазорати корҳои хориҷии Тоҷикистон хабар медиҳад, зимни нишаст ҳолати кунунӣ ва дурнамои ҳамкориҳои шашҷониба баррасӣ шуд.

"Таваҷҷуҳи вежа ба раванди татбиқи мувофиқаҳои аз натиҷаи саммити дуюми сарони давлатҳои қолаби «Осиёи Марказӣ – Россия» дар шаҳри Душанбе ҳосилшуда, зоҳир гардид" - омадааст дар хабарнома.

Манбаъ меафзояд, ки вазири корҳои хориҷии Ҷумҳурии Тоҷикистон зимни суханронӣ зарурати гузариш ба иқтисодиёти “сабз”-ро таъкид намуда, ҷиҳати таҳкими ҳамкориҳои минтақавӣ дар соҳаи энергетикаи барқароршаванда, ташаккули «кластерҳои сабз» ва мутобиқшавӣ ба тағйирёбии иқлим даъват кард.

Гуфта мешавад, ки бо назардошти нақши фаъоли Тоҷикистон дар дипломатияи ҷаҳонии обу иқлим, Сироҷиддин Муҳриддин ҳамчунин пешниҳод кард, ки платформаи махсус ҷиҳати табодули технологияҳо ва таҷрибаҳои пешқадам дар доираи рӯзномаи экологӣ таъсис гардад.

Dialog.tj