Шаҳрвандони Ҷумҳурии Тоҷикистон, ки дар Федератсияи Русия фаъолият мекунанд, дар соли 2024 ба ватан беш аз 1,8 миллиард доллари Иёлоти Муттаҳидаи Амрико интиқол додаанд. Дар ин хусус, ёвари президенти Русия Юрий Ушаков дар остонаи сафари давлатии Владимир Путин ба Тоҷикистон ба хабарнигорон иттилоъ дод.

Ба гуфтаи ӯ, дар Русия ҳоло тақрибан 1,2 миллион шаҳрванди Тоҷикистон фаъолият доранд, ки 16 фоизи ҳамаи муҳоҷирони хориҷӣ дар қаламрави ин кишварро ташкил медиҳанд.

“Ҳаҷми маблағҳои интиқолёфтаи шаҳрвандони Тоҷикистон, ки дар Русия кор мекунанд, дар соли 2024 аз 1,8 миллиард доллар гузашт. Ин тақрибан 17 фоизи Маҷмуи маҳсулоти дохилии Ҷумҳурии Тоҷикистонро ташкил медиҳад. Ин нишондиҳанда унсури хеле муҳимми ҳамкории ду кишвари мо ба шумор меравад”- зикр кард Юрий Ушаков.

Ёвари Президенти Русия илова кард, ки масъалаҳои муҳоҷирати меҳнатӣ яке аз мавзуъҳои асосии барномаи сафари ҳайати Русия ба Тоҷикистон хоҳад буд, ки 8-уми октябр оғоз меёбад.

Дар ҳайати расмии Русия Владимир Колоколтсев, вазири корҳои дохилии ин кишвар низ ширкат хоҳад кард. Ӯ дар музокирот оид ба масъалаҳои вобаста ба муҳоҷирати меҳнатӣ ва иқомати қонунии шаҳрвандони хориҷӣ дар Русия ширкат мекунад.

Интизор меравад, ки сафари Президенти Русия Владимир Путин ба Тоҷикистон хусусияти давлатӣ дошта бошад. Дар ҷараёни гуфтугӯҳо роҳбарони ду кишвар самтҳои асосии ҳамкориҳои дуҷониба, аз ҷумла дар соҳаҳои сиёсат, иқтисод, фарҳанг, гуманитарӣ ва муҳоҷиратро мавриди баррасӣ қарор хоҳанд дод.

Dialog.tj