Тавре ки АМИТ «Ховар» бо такя ба маълумоти Мақомоти иҷроияи ҳокимияти давлатии шаҳри Душанбе хабар медиҳад, давоми се рӯз зиёда аз 10 ҳазору 500 нафар аз дуюмин Намоишгоҳи байналмилалии сайёҳии Душанбе дидан карданд.

Манбаъ меафзояд, ки дар намоишгоҳ зиёда аз 200 ширкати хизматрасони соҳаи сайёҳӣ, аз ҷумла 65 ширкати хориҷӣ аз кишварҳое ба монанди Олмон, Британияи Кабир, Русия, Туркия, Аморати Муттаҳидаи Араб, Арабистони Саудӣ, ИМА, Эрон, Покистон, Баҳрайн, Узбекистон, Қирғизистон, Қазоқистон, Туркманистон, Яман, Сурия ва Марокко иштирок намуданд.

Иттилоъ дода мешавад, ки дар ҷараёни Намоишгоҳи байналмилалии сайёҳии Душанбе меҳмонони намоишгоҳ имкон пайдо карданд, ки бо захираҳо ва имкониятҳои сайёҳии Тоҷикистон ва кишварҳои иштирокдор аз наздик шинос шаванд ва ҳамчунин оид ба маҳсулот ва хизматрасонии ширкатҳои сайёҳии дохилӣ ва хориҷӣ маълумоти муфассал ба даст оранд.

Гуфта мешавад, ки ба чанде аз иштирокдорон ва шарикон, аз ҷумла воситаҳои ахбори омма ва блогерон барои тарғибу ташвиқи Намоишгоҳи байналмилалии сайёҳии Душанбе ҷоизаҳои «DITE Awards 2025», сипосномаҳо ва гувоҳномаҳо супорида шуданд.

Ёдовар мешавем, ки дуюмин Намоишгоҳи байналмилалии сайёҳии Душанбе (Dushanbe International Tourism Exhibition, DITE-2025) аз 18-ум то 20-уми сентябр бо ташаббуси Мақомоти иҷроияи ҳокимияти давлатии шаҳри Душанбе ва дастгирии Кумитаи рушди сайёҳии назди Ҳукумати Ҷумҳурии Тоҷикистон аз ҷониби ширкати сайёҳии «Сомон Трэвел» ва шарикони рушд баргузор карда шуд.

Dialog.tj