Дар шаҳри Мински Белорусия 16-уми сентябри соли ҷорӣ нишасти навбатии Шурои намояндагони доимии кишварҳои ширкаткунандаи Иттиҳоди Давлатҳои Мустақил баргузор шуд.

Дар ин нишаст масъалаи омодагӣ ба мулоқоти навбатии Шурои сарони ҳукуматҳои узви Иттиҳоди Давлатҳои Мустақил, ки рӯзи 29-уми сентябр дар шаҳри Минск баргузор мегардад, баррасӣ гардид.

Зикр шуд, ки ба лоиҳаи рӯзномаи ҷаласа 14 масъала ва 25 санад ворид шудааст. Аз ҷумла, ҷонибҳо тарҳи Стратегияи рушди илмӣ-технологии Иттиҳоди Давлатҳои Мустақил барои солҳои 2026-2035-ро баррасӣ карданд. Ҳамчунин, санадҳои вобаста ба ҳамкорӣ дар соҳаи ҳоҷагии ҷангал ва саноати чӯб, кишоварзӣ, рақамисозии долонҳои асосии нақлиёти мултимодалӣ, рушди ҷомеаи иттилоотӣ ва иқтисоди рақамӣ пешниҳод гардидааст.

Ба рӯзнома, ҳамчунин, лоиҳаи консепсияи нархгузорӣ дар соҳаи сохтмон ва нақшаи татбиқи он, нақшаи амалҳои вобаста ба марҳилаи дуюми стратегияи рушди иқтисодии Иттиҳоди Давлатҳои Мустақил то соли 2030 ворид шудааст.

Дар баробари ин, масъалаҳои ҳамкорӣ дар соҳаи истифодаи энергияи атомӣ бо мақсади осоишта, баргузории соли ҳифзи тандурустӣ дар Иттиҳоди Давлатҳои Мустақил дар соли 2026, ҳамкориҳои инноватсионӣ низ мавриди баррасӣ қарор гирифтанд.

Намояндагони доимӣ ҳамчунин, ҷараёни омодагӣ ба ҷаласаҳои Шурои вазирони корҳои хориҷӣ ва Шурои сарони давлатҳои Иттиҳоди Давлатҳои Мустақилро баррасӣ карданд, ки моҳи октябр дар шаҳри Душанбе доир хоҳанд шуд.

Дар нишасти вазирони корҳои хориҷӣ 9 масъала ва ба рӯзномаи ҷаласаи сарони кишварҳо 17 масъала ( 17 санад) ворид гардидааст.

Қарор аст дар нишасти пешбинишуда табодули назар оид ба ҳамкорӣ дар доираи Иттиҳоди Давлатҳои Мустақил сурат гирад. Ҳамчунин, фаъолияти комиссияи ҳуқуқи инсон дар бахши густариши ҳамкории ҳуқуқӣ баррасӣ мешавад.

Дар ин нишаст сарони кишварҳои узви ИДМ бахшида ба 40-солагии фоҷеаи Чернобил, 80-солагии таъсиси Созмони Милали Муттаҳид, ҳамчунин, дар масъалаи ҳифзи ҳуқуқ ва қонунгузорӣ изҳорот  хоҳанд дод.

Дар меҳвари гуфтугӯи сарони кишварҳои узи Иттиҳоди Давлатҳои Мустақил ҳамчунин, масъалаи ҳамкории ҳарбӣ, таъмини амнияти энергетикии минтақавӣ, мубориза бо терроризм ва ифротгароӣ қарор хоҳад гирифт.

Dialog.tj