Дар давроне, ки ҷаҳон бо низоъҳои мухталифи геполитикӣ рӯ ба рӯ аст, кишварҳои Осиё ва пасошӯравӣ ба варзиш рӯ овардаанд, то рамзи ҳамбастагӣ ва сулҳро ба намоиш гузоранд.

Бар асоси иттилои расмӣ аз 4-ум то 12-уми сентябр дар соҳилҳои кӯли Иссиқкӯл Бозиҳои байналмилалии варзишӣ таҳти шиори “Осиё –минтақаи иттиҳод ва сулҳ” баргузор мегардад.

Аввалин бор ин бозиҳо дар соли 2001 бо ширкати беш аз 80 варзишгар оғоз шуда буд ва ҳоло он ба як майдони бузурги варзишӣ, бо ширкати беш аз 3000 ширкаткунанда табдил ёфтааст. Ин чорабинии варзишӣ мақоми бузургтарин мусобиқаи мунтазами варзишӣ дар Осиёи Марказиро соҳиб шудааст.

Дар баробари намудҳои варзиши маъмулӣ, мусобиқаҳои миллӣ ва анъанавӣ низ ба барнома ворид шудаанд, ки ба гуфтаи таҳлилгарон рамзи эҳтироми гуногунрангии фарҳангҳо дар доираи Иттиҳоди Давлатҳои Мустақил ва Созмони ҳамкории Шанхай мебошад.

Барои ширкат дар бозиҳои варзишии Иссиқкӯл варзишгарон аз Русия, Қазоқистон, Тоҷикистон, Ӯзбекистон, Туркманистон, Озарбойҷон ва Беларусия ворид шуданд. Ҳамзамон, Чин, Ҳиндустон ва Муғулистон, ки ширкаткунандагони доимӣ маҳсуб мешаванд, бо ҳузури худ нақши ин мусобиқаҳоро дар ҳамкории минтақавӣ тақвият мебахшанд.

Мутахассисон мегӯянд, ки чунин чорабиниҳо аз доираи варзиш берун рафта, ба василаи “дипломатияи нав” табдил ёфтааст. Абзоре, ки кишварҳоро бо вуҷуди ихтилофоти сиёсӣ барои нишастан дар як миз ва ҷустуҷӯи ҳамкориҳо водор месозад.

Чорабинӣ бо дастгирии молии Хазинаи байнидавлатии ҳамкории башардӯстонаи кишварҳои Иттиҳоди Давлатҳои Мустақил доир мешавад, ки мақсади он густариши ҳамкории фарҳангӣ ва иҷтимоӣ миёни миллатҳои минтақа мебошад.

Dialog.tj