Эмомалӣ Раҳмон, Президенти Ҷумҳурии Тоҷикистон ва Рустами Эмомалӣ, Раиси Маҷлиси миллии Маҷлиси Олӣ, Раиси шаҳри Душанбе дар кӯчаи Лермонтови ноҳияи Сино кӯдакистони хусусии “Марям” –ро мавриди баҳрабардорӣ қарор доданд.

Ин бинои муосир дар доираи нақшаи корҳои ободонӣ бахшида ба 35-солагии Истиқлоли давлатӣ ва бо иқдоми созандаи роҳбарияти шаҳри Душанбе бунёд шудааст. Сохтмони он моҳи феврали соли 2023 оғоз шуда, дар муҳлати 16 моҳ аз ҷониби соҳибкори ватанӣ Исломҷон Муродов бо ҷалби беш аз 150 коргар анҷом ёфт.

Муассиса сеошёна буда, бо таҳхона барои 200 кӯдак пешбинӣ шудааст. Ҳуҷраҳои таълимӣ бо мизу курсӣ, бозичаҳои гуногун ва таҷҳизоти зарурӣ таъмин буда, дарсҳо бо се забон – тоҷикӣ, русӣ ва англисӣ, гузаронида мешаванд. Дар кӯдакистон 30 мутахассиси соҳа, аз ҷумла мураббиён ва парасторон фаъолият мекунанд.

Саҳни ҳавлии боғча бо 6 айвонча, майдончаҳои бозӣ, ҳайкалчаҳои қаҳрамонҳои афсонавӣ, фаввора ва гулу дарахтони ороишӣ зебу зиннат дода шудааст. Дар дохили бинои муассиса утоқҳои хоб, толори мусиқӣ, рақс, рассомӣ, варзиш ва ҳаммом барои 10 гурӯҳ омода гардидааст.

Эмомалӣ Раҳмон, сарвари кишвар дар маросими ифтитоҳ ба сифати корҳои сохтмонӣ баҳои баланд дода, таъкид карданд, ки таҳсилоти томактабӣ марҳилаи муҳимми рушди зеҳнии кӯдакон мебошад.

Сарвари кишвар ин кӯдакистони навро туҳфаи арзишманд барои насли наврас номида, аз мураббиён даъват намуданд, ки кӯдаконро дар руҳияи ватандӯстӣ тарбия намоянд.

Dialog.tj