Як бунёди русӣ Эмомалӣ Раҳмон, Садир Жапаров ва Шавкат Мирзиёевро барои дарёфти ҷоизаи сулҳи Лев Толстой пешниҳод намудааст.

Бар асоси иттилоъ, бунёди ҷамъияти байналмилалии “Фонди русии сулҳ” – Эмомалӣ Раҳмон, Президенти Ҷумҳурии Тоҷикистон, Содир Жапаров, Президенти Ҷумҳурии Қирғизистон ва Шавкат Мирзиёев, Президенти Ҷумҳурии Ӯзбекистонро барои дарёфти ҷоизаи байналмилалии сулҳи ба номи Лев Толстой номзад намудааст.

Дар ин хусус, хабаргузории ТАСС иттилоъ дода, афзуд, ки ин ҷоиза барои саҳми назаррас дар таъмини амният ва баробарӣ дар асоси волоияти ҳуқуқи байналмилалӣ, бунёди ҷаҳони чандқутбӣ ва таҳкими ҳамдигарфаҳмӣ ва ҳамкории миёни халқҳо дода мешавад.

Дар номи раиси Шурои фонди мазкур ва раиси Кумитаи корҳои байналмилалии Думаи давлатии Русия Леонид Слутский ба ҳайати ҳакамон зикр кардааст, ки 31-уми марти соли 2025 дар нахустин нишасти сарони се кишвар дар шаҳри Хуҷанд созишномаи таърихӣ дар хусуси сарҳадҳои Қирғизистон, Тоҷикистон, Ӯзбекистон ва эъломияи Хуҷанд дар хусуси дӯстии абадӣ имзо шуд. Ин санадҳо ба таъмини субот, рушди устувор ва боло бурдани нуфузи байналмилалии минтақа мусоидат мекунанд.

“Фонди ҷамъиятии байналмилалии “Фонди русии сулҳ” пешниҳод мекунад, ки ин рӯйдоди муҳим ва таърихӣ бо пешбарии президентҳои Ҷумҳурии Қирғизистон – Садир Жапаров, Ҷумҳурии Тоҷикистон- Эмомалӣ Раҳмон ва Ҷумҳурии Ӯзбекистон – Шавкат Мирзиёев ба ҷоизаи байналмилалии сулҳи ба номи Л. Н. Толстой таҷлил карда шавад, зеро онҳо саҳими муҳим дар ташаккули ҷаҳони чандқутбӣ ва таҳкими ҳамдигарфаҳмии миёни халқҳо гузаштаанд”- афзуд Слутский.

Слутский илова кард, ки бо талошҳои ин роҳбарон амният дар фазои Авруосиё таъмин мешавад ва гуфтугӯи миёни кишварҳои Осиёи Марказӣ идома дорад ва ташаббусҳо барои ташкил намудани фазои бидуни раводид ва боло бурдани ҷозибаи сайёҳии минтақа пайгирӣ мешавад.

Dialog.tj