Тибқи пешгӯии Агентии обуҳавошиносии Кумитаи ҳифзи муҳити зисти назди Ҳукумати Ҷумҳурии Тоҷикистон аз 3-юм то 7-уми июли соли ҷорӣ дар кишвар ҳавои гарми ғайримуқаррарӣ ва омадани селҳои пиряхӣ пешгӯӣ мешавад.

Манбаъ меафзояд, ки дар ин рӯзҳо дар водиҳои вилояти Хатлон ҳаво 42+47 дараҷа, минтақаҳои водибудаи ноҳияҳои тобеи ҷумҳурӣ 39+44 дараҷа, водиҳои вилояти Суғд 38+43 дараҷа, ноҳияҳои доманакӯҳӣ 35+40 дараҷа ва дар ноҳияҳои кӯҳӣ 34+39 дараҷа гармӣ дар назар дошта шудааст.

Ҳамчунин, гуфта мешавад, ки аз сабаби гармшавии тӯлонӣ ва зиёд шудани обшавии қабати барф ва пиряхҳо дар минтақаҳои ғарбии Вилояти Мухтори Кӯҳистони Бадахшон, ноҳияҳои доманакӯҳӣ ва кӯҳии вилояти Суғд ва минтақаҳои кӯҳии ноҳияҳои тобеи ҷумҳурӣ омадани селҳои пиряхӣ зиёд мегардад.

Ба шаҳрвандон тавсия дода мешавад, ки давоми рӯзҳои 3-7-уми июл аз соати 11:00 то 16:00 дар кӯча сайругаштро кам намоянд. Нӯшидани таоми моеъ ва об, нӯшокиҳои мевагӣ ва афшура тавсия дода мешавад. Аз нӯшидани нӯшокиҳои ширин ва спиртӣ бояд худдорӣ намуд.

Dialog.tj