Содир Ҷабборов, президенти Ҷумҳурии Қирғизистон рӯзи якшанбе Вазири корҳои хориҷии Ҷумҳурии Тоҷикистон Сироҷиддин Муҳриддинро дар шаҳри Чолпон-Ато ба ҳузур пазируфт. Ин мулоқот дар остонаи сафари расмии дарпешистодаи Президенти Қирғизистон ба Тоҷикистон баргузор шуд.

Ба иттилои хадамоти матбуоти Президенти Қирғизистон ҷонибҳо дар мулоқот масъалаҳои калидии рушди ҳамкориҳо дар бахшҳои тиҷоративу иқтисодӣ, фарҳангиву гуманитарӣ ва ҳамчунин, ҳамкориҳоро дар минтақаҳои наздисарҳадӣ мавриди баррасии амиқ қарор доданд. Бар асоси изҳороти расмӣ баҳсу гуфтугӯҳо бо рӯзномаи сафари расмии Содир Ҷабборов ба Тоҷикистон марбут буд. Дар ин мулоқот масъалаи сафари Президенти Қирғизистон ба шаҳри Душанбе ва омодагӣ ба ин сафари расмӣ баррасӣ гардид.

Дар ҷараёни мулоқот Сироҷиддин Муҳриддин омодагии Душанберо барои рушди ҳамкорӣ дар ҳама соҳаҳо, бахусус иқтисод ва тиҷорат баён намуда, аз рушди ҳаҷми савдои дуҷониба хабар дод. Ба гуфтаи ӯ, вазорат ва ниҳодҳои марбутаи Тоҷикистон вазифадоранд, ки барнома ва чораҳои мушаххасеро таҳия намоянд, ки ба афзоиши назарраси гардиши мол миёни ду кишвар мусоидат мекунанд.

Президенти Қирғизистон дар мулоқот бо дипломати тоҷик таъкид кард, ки ба шарофати талошҳои муштараки ду кишвар муносибатҳои дуҷониба рушд мекунад ва имзои созишномаи таърихӣ оид ба марзи давлатӣ дар моҳи марти соли ҷорӣ як қадами муҳим ва заминаи муносиб барои таҳкими эътимоди миёни Бишкек ва Душанбе аст. Ӯ афзуд, ки густариши ҳамкориҳо миёни минтақаҳои наздисарҳадии ду кишвар ба манфиати таҳкиму субот ва пешбурди муносибатҳои ҳамсоягии нек хоҳад буд.

Содир Ҷабборов ҳамзамон ба зарурати баргузор кардани чорабиниҳои муштараки фарҳангию гуманитарӣ барои наздик намудани халқҳои ду кишвар таъкид кард. Ӯ гуфт, ки мубодилаи фарҳангӣ ва робитаҳои инсонӣ ба воситаи таҳкими дӯстӣ ва ҳусни тафоҳум миёни мардумони Қирғизистон ва Тоҷикистон боқӣ мемонад.

Dialog.tj