Расонаҳои ғарбӣ рӯзи гузашта дар бораи ҷузъиёти суҳбати телефонии Доналд Трамп ва Бенямин Нетаняҳу гузорише нашр карданд ва дар он ишора шудааст, ки Доналд Трамп ба Исроил барои ҳамла ба Эрон чароғи сабз нишон нахоҳад дод.

Сомонаи исроилии “Натсив” бо ишора ба ҷузъиёти суҳбати телефонии роҳбарони ду кишвар навишт, бо афзоиши низоъ миёни Исроил ва Эрон ва шиддат гирифтани таҳдидҳои дуҷониба як сарчашмаи огоҳи исроилӣ тасдиқ кард, ки Доналд Трамп ба Бенямин Нетаняҳу ошкоро гуфт, дар ин фурсати наздик иҷозаи ҳамла ба Эронро нахоҳад дод.

Дар гузашта низ гузоришҳое нашр шуда буд, ки Исроил барои ҳамлаи эҳтимолии барқосо дар сурати нокомии музокироти атомии ғайримустақими Вашингтон бо Теҳрон омодагӣ мебинад.

Дар ҳамин ҳол Рафаэл Гросси, раиси кулли Агентии байналмилалии атомӣ ба Исроил нисбат ба ҳамла ба муассисаҳои атомии Эрон ҳушдор додааст. Ӯ дар мусоҳиба бо шабакаи “24 нюс” гуфтааст, ки иншооти мазкур “ба таври шадид устувор гардидаанд ва барои осеб расонидан ба онҳо ниёз ба қудрати вайронкунандаи бузурге лозим аст”. Рафаэл Гросси афзуд, ки чунин ҳамла метавонад таъсири шадид дошта бошад ва эҳтимоли тасмими Эрон барои пайгирии сохтани силоҳи атомӣ ва хориҷ шудан аз созишномаи паймонӣ густариши силоҳи атомиро афзоиш диҳад.

Dialog.tj