Вазири корҳои хориҷии Ҷумҳурии Исломии Эрон дар вокуниш ба хабари таҳдидҳои Исроил барои ҳамла ба Эрон гуфт, ки “ҳич кас ҷуръати ҳамла ба Эронро надорад”, ҳама аз тавоноии дифоии он хабар доранд ва “забони таҳдид дар баробари Эрон короӣ” надорад.

Аббос Ироқчӣ ғанисозии уранро “масъалаи бунёдӣ” барои Ҷумҳурии Исломии Эрон дониста, афзуд, ки ихтилофҳои асосӣ дар ин хусус бо Амрико ҳанӯз боқӣ мондаанд.

Вазири корҳои хориҷии Амрико Марко Рубио рӯзи чоршанбе гуфта буд, ки танҳо созиши қобили қабул тафоҳумест, ки ба қатъи комили ғанисозии уран дар Эрон боис шавад: “Мо бовар дорем, ки Эрон набояд иҷозаи ғанисозии уран дошта бошад. Агар битавонанд ғанисозӣ кунанд, метавонанд онро ба силоҳ табдил диҳанд ва ин барои мо ғайриқобили қабул аст”.

Баъди вокуниши тунди мақомоти Эрон дар хусуси қатъ намудани ғанисозии уран расонаҳои амрикоӣ аз қавли манобеи худ дар ҳукумати Амрико навиштанд, ки Исроил барои ҳамла ба муассисаҳои атомии Эрон омода мешавад. Як сарчашма аз дохили ҳукумати Эрон ба расонаҳои амрикоӣ гуфт, ки “эҳтимоли ҳамлаи Исроил ба муассисаҳои атомии Эрон дар моҳҳои ахир афзоиш ёфтааст”.

Бо вуҷуди ихтилофи назарҳо рӯзи гузашта Вазорати корҳои хориҷаи Уммон хабар дод, ки музокироти даври чоруми Эрон ва Амрико ҳафтаи оянда рӯзи ҷумъа дар шаҳри Руми Италия баргузор хоҳад шуд.

Dialog.TJ