Дар ҷараёни сафари раиси вилояти Суғд Раҷаббой Аҳмадзода ба шаҳри Конибодом як қатор иншоотҳои иҷтимоӣ, аз ҷумла боғчаи фарҳангӣ-фароғатии Истиқлол баъди навсозии ду майдони муосири варзишӣ дар ҷамоатҳои деҳоти Фирӯзоба ва Патар мавриди баҳрабардорӣ қарор гирифт.

Дафтари матбуоти раиси вилояти Суғд хабар дод, ки Боғи Истиқлол баъд аз навсозӣ бо беш аз 20 аттраксиони нав, нуқтаҳои фурӯши нӯшокиҳои сард, ҷойҳои нишасту бозии кӯдакон ва макон барои баргузории чорабиниҳои фарҳангӣ таъмин гардид.

Раҷаббой Аҳмадзода гуфт, ки навсозии боғи марказии шаҳр бо ташаббус ва дастгириҳои доимии президенти Ҷумҳурии Тоҷикистон Эмомалӣ Раҳмон амалӣ гардидааст. Ӯ афзуд, ки “Ободу зебо гардонидани шаҳр ва беҳтар намудани шароити фароғати сокинон аз афзалиятҳои муҳимми барномаи давлатии рушди минтақаҳо ба шумор меравад”.

Масоҳати Боғи Истиқлол 1,7 гектарро ташкил дода, он ба макони машҳури фароғатии кӯдакон ва калонсолон табдил шудааст.

Ҳамчунин, Раҷаббой Аҳмадзода дар доираи сафараш ба шаҳри Конибодом дар маросими ифтитоҳи ду майдони варзишӣ ширкат намуд. Яке аз ин майдонҳо дар ҳудуди мактаби таҳсилоти миёнаи умумии №37, воқеъ дар деҳаи Ҳисораки ҷамоати Фирӯзоба бунёд гардидааст. Варзишгоҳ бо ташаббуси сокинони маҳаллӣ бо ҳашар сохта шудааст.

Dialog.tj