Эмомалӣ Раҳмон, президенти Ҷумҳурии Тоҷикистон бо Искандар Муъминӣ, вазири корҳои дохилии Ҷумҳурии Исломии Эрон масъалаҳои робитаҳои дуҷонибаро баррасӣ карданд.

Дафтари матбуоти президенти Ҷумҳурии Тоҷикистон хабар дод, ки дар ҷараёни мулоқот ҷонибҳо ба тақвияти ҳамкорӣ миёни вазоратҳои корҳои дохилии ду кишвар бо истифода аз абзорҳои мавҷуд таъкид намуданд. Онҳо доир ба тавсиаи ҳамкорӣ вобаста ба таҳаввулоти ҷиддии нигаронкунанда дар ҷаҳони имрӯза, шиддати рақобатҳои геосиёсӣ, таҳдиду хатарҳои замони муосир гуфтугӯ намуданд.

“Зарур дониста шуд, ки барои муқовимати муассир ба зуҳуроти терроризм, ифротгароӣ, тундгароӣ ва ҷиноятҳои муташаккили фаромиллӣ, аз ҷумла киберҷиноятҳо ва қочоқи маводи мухаддир иқдомҳои муштарак андешида шавад”- афзуд дафтари матбуоти президенти Ҷумҳурии Тоҷикистон.

Расонаҳои эронӣ навиштанд, ки Искандар Муъминӣ дар ҷараёни мулоқот  паём ва дуруди доктор Масъуд Пизишкиён, президенти Ҷумҳурии Исломии Эронро ба Эмомалӣ Раҳмон расонид. Дар посух Эмомалӣ Раҳмон гуфт: “Салом ва дуруди маро ба бародарам доктор Масъуд Пизикшиён расонед”.

Эмомалӣ Раҳмон дар ҷараёни мулоқот таъкид кард, барои тавсеа ва таҳкими робитаҳо дар бахшҳои сиёсӣ, амниятӣ, фарҳангӣ, иҷтимоӣ ва гардишгарӣ ягон маҳдудият вуҷуд надорад.

Искандар Муъминӣ гуфт, ки Эмомалӣ Раҳмон омодагии комили Тоҷикистонро барои иҷрои созишномаҳои баимзорасида дар ҷараёни сафари Масъуд Пизишкиён изҳор намуд.  Вазири корҳои дохилии Эрон изҳори умедворӣ намуд, ки муносибатҳои ду кишвар бо назардошти муштаракоти фарҳангӣ, таърихӣ, динӣ ва забонӣ таҳким хоҳад ёфт.

“Яке аз масъалаҳои матраҳшуда дар ин мулоқот лағви раводид (виза) миёни ду кишвар буд, ки дар марҳилаи аввал барои парвозҳои ҳавоӣ лағв шудааст ва қарор аст дар марҳилаи баъдӣ барои дигар навъҳои сафар низ амалӣ гардад” – гуфт Искандар Муъминӣ.

Dialog.tj