Ярмаркаи солонаи ҷойҳои корӣ дар шаҳри Хуҷанд дар Донишгоҳи давлатии ҳуқуқ, бизнес ва сиёсати Тоҷикистон доир гардид. Чорабинӣ бо ташаббуси раёсати Агентии меҳнат ва шуғли аҳолӣ дар вилояти Суғд ташкил шудааст.

Гуфта мешавад, ки чорабинии мазкур барои таъмин намудани хатмкунандагон бо ҷойи кор ва баланд бардоштани сатҳи омодагии касбии онҳо мусоидат хоҳад кард.

Қобили зикр аст, ки дар ярмарка 26 ширкат ва ташкилот иштирок намуда, зиёда аз 2000 ҷойи корӣ пешниҳод намуданд. Аз ҷумла, бузургтарин бонки кишвар, ба мисли “Амонатбонк”, “Эсхата”, “Имон интернешнл”, “Ҳумо”, ва “Алиф Бонк”, ҳамчунин, корхонаҳои “Файзи расул”, “Кабири Хуҷанд”, “Зуҳал” ва ғайра иштирок намуданд.

Дар ҷараёни ярмарка донишҷӯён имкони шинос шудан аз шароити кор, гузаштан аз мусоҳибаи корӣ ва пешниҳод намудани тарҷумаи ҳоли худро пайдо карданд. Тибқи иттилоъ, ба корҷӯён ҷои корӣ бо маоши аз 1500 то 5000 сомонӣ пешниҳод гардид.

Дар фарҷоми ярмаркаи ҷойҳои корӣ ширкатҳо ва сохторҳои давлатӣ барои иштироки фаъолона бо ифтихорномаи Донишгоҳ қадрдонӣ шуданд.

Dialog.tj