Масъуд Пизишкиён, президенти Ҷумҳурии Исломии Эрон дар идомаи мулоқот ва дидорҳои худ бо мақомоти олирутбаи Тоҷикистон бо Қоҳир Расулзода дидор ва мулоқот намуд.

Масъуд Пизишкиён дар мулоқот бо сарвазири Тоҷикистон Қоҳир Расулзода таъкид кард, ки собиқаи деринаи тамаддуниву фарҳангӣ ва равобити тӯлонии ду миллат заминаи гастариши робитаҳои дуҷонибаро фароҳам мекунад.

“Иртибототи ду миллати Эрону Тоҷикистон дарҳам танида ва амиқ аст, то ҷое ки вақте аз хиёбонҳои Душанбе убур мекунам, номҳои хиёбонҳо ва нишонаҳо ҳамонҳоест, ки мо дар китобҳои дарсии худ дар гузашта хондаем: мисли Рӯдакӣ, Фирдавсӣ ва Ҳофиз. Мо дар ин кишвар эҳсоси ғурбат намекунем”- таъкид кард Масъуд Пизишкиён.

Президенти Ҷумҳурии Исломии Эрон дар ин мулоқот ба зарурати густариши робитаҳои тиҷоративу фарҳангӣ таъкид намуда, афзуд, ки собиқаи муштараки ду кишвар тақозо мекунад, робитаҳоро густариш диҳем ва ҳамкориҳоро дар ҳама заминаҳо амиқтар кунем.

“Эрон маҳдудияте барои густариши робита бо Тоҷикистон дар заминаҳои мухталиф надорад ва талош дорем монеаҳои эҳтимолии  пеши рӯйи ин ҳадафро рафъ кунем”- таъкид кард Масъуд Пизишкиён.

Қоҳир Расулзода, сарвазири Тоҷикистон низ густариши ҳамкориҳо бо Эронро яке аз ҳадафҳои муҳимми сиёсати хориҷии Тоҷикистон дониста, таъкид кард, ки сафари Президенти Ҷумҳурии Исломии Эрон аҳмияти бисёр муҳим дорад.

“Сафари Шумо ва асноде, ки миёни ду кишвар имзо шуд, барои Тоҷикистон аҳамияти бисёре дорад. Имзои ин теъдод мувофиқатнома ва санади ҳамкорӣ нишон аз сатҳи болои робитаҳои дуҷониба дорад”- гуфт Қоҳир Расулзода.

Сарвазири Тоҷикистон Қозир Расулзода бо ишора ба собиқаи тӯлонии равобити Эрону Тоҷикистон таъкид кард, ки доду гирифти тиҷоратӣ миёни ин ду кишвар дар ҳоли афзоиш аст.

“Ҳаҷми тиҷорат миёни ду кишвар бояд ҳар чи зудтар ба ду баробар бирасад ва мо хоҳони равобити амиқу густурда дар ҳама заминаҳо бо Эрон ҳастем”- афзуд Қоҳир Расулзода.

Dialog.tj