Вазорати корҳои хориҷаи Покистон мегӯяд, ки бисту севумин нишасти сарони кишварҳои узви Созмони Шанхай бо мизбонии Покистон рӯзҳои 15 – 16-уми октябр дар Исломободи Покистон баргузор мешавад.

Тибқи иттилои сухангӯи Вазорати корҳои хориҷаи Покистон дар нишасти мазкур узви доимии Созмон, меҳмонҳои вижаи он, узви нозир ва дигар созмонҳои минтақавӣ ва байналмилалӣ ширкат менамоянд. Дар ҷаласаи сарони Созмон ҳадафҳои он, масъалаҳои равобити иқтисодиву тиҷоратӣ, тақвияти ҳамкориҳо ва нақшаи роҳ барои фаъолияти минбаъдаи он баррасӣ ва муҳокима хоҳад шуд.

Мамтоз Заҳро, сухангӯи Вазорати корҳои хориҷаи Покистон таъкид кард, ки кишвараш раиси давраи Шурои давлатҳои узви Шанхай аст ва бо ин далел нишасти мазкур бо мизбонии сарвазири ин кишвар Муҳаммад Шаҳбоз Шариф доир мегардад. Ӯ меафзояд “Илова бар аъзои доимии Созмон кишварҳои Муғилистон ҳамчун узви нозир, Туркманистон ҳамчун меҳмони вижа ва дигар намояндагони созмонҳои байналмилалӣ ва минтақавӣ, аз ҷумла Созмони конфронси таомул ва иқдомоти эътимодсозии Осиё (CICA), Созмони кишварҳои муштаракулманофеъ (CIS) ва Созмони ҷомеаи иқтисодии Аврупо (EEC) низ дар нишаст ширкат хоҳанд кард” .

Вазорати корҳои хориҷаи Покистон таъкид мекунад, ки доир шудани нишасти сарони кишварҳои узви Шанхай нишондиҳандаи уҳдадориҳои устувори ин кишвар бар ҳадафҳо ва маншури Созмон аст.

Покистон ба манзури таъмини амнияти меҳмонон рӯзҳои баргузории нишастро дар Исломобод, Ровалпандӣ ва дигар минтақаҳои наздики пойтахт рухсатии умумӣ эълон намудааст.