8-уми октябр дар Театри академии опера ва балети ба номи С. Айнӣ гала-консерти ғолибони Бозиҳои XX-уми Делфии ҷавонони давлатҳои аъзои Иттиҳоди Давлатҳои Мустақил баргузор гардид.

Маркази матбуоти Вазорати фарҳанги Ҷумҳурии Тоҷикистон навиштааст, ки дар гала-консерти ҷамъбастӣ ғолибон ва ҷоизадорони озмунҳои гуногуни Бозиҳои XX-уми Делфӣ бо барномаҳои рангини ҳунарӣ баромад карданд.

“Барномаи консертӣ таҷассумгари дӯстии фарҳангӣ, ҳамдигарфаҳмӣ ва ҳамкории ҷавонони кишварҳои аъзои Иттиҳоди Давлатҳои Мустақил буд. Иштироки намояндагони кишварҳои гуногун дар чунин як чорабинии сатҳи байналмилалӣ барои таҳкими робитаҳои фарҳангӣ, рушди ҳамкориҳои ҷавонон ва муаррифии дастовардҳои санъати миллӣ заминаи мусоид фароҳам меорад”, - омадааст дар иттилоия.

Гуфта мешавад, ки Бозиҳои Делфӣ яке аз майдонҳои муҳими байналмилалӣ барои муаррифӣ ва рушди истеъдодҳои ҷавон дар соҳаи фарҳанг ва санъат ба шумор рафта, барои иштирокчиён имконият фароҳам меоранд, ки маҳорати касбӣ ва ҳунарии худро нишон дода, бо намояндагони дигар кишварҳо табодули таҷриба намоянд.

Dialog.tj