Дар асоси қарори раиси шаҳри Душанбе аз 24-ум то 26-уми сентябри соли равон дар пойтахти Ҷумҳурии Тоҷикистон «Намоишгоҳи байналмилалии сайёҳии Душанбе – 2026» (Dushanbe International Tourism Exhibition – DITE-2026) ва Форуми байналмилалии Душанбе таҳти унвони «Ҳамгироии шаҳрҳо дар татбиқи имкониятҳои сайёҳии устувор» баргузор мегардад.

Бинобар иттилои шуъбаи рушди сайёҳии Мақомоти иҷроияи ҳокимияти давлатии шаҳри Душанбе, дар Форуми байналмилалии Душанбе «Ҳамгироии шаҳрҳо дар татбиқи имкониятҳои сайёҳии устувор» иштироки намояндагони бахши сайёҳии бародаршаҳрҳо ва шаҳрҳои шарики Душанбе, вазорату идораҳои соҳавии кишварҳои минтақа, созмонҳои байналмилалӣ, доираҳои илмӣ, сармоягузорон, ширкатҳои сайёҳӣ ва дигар субъектҳои хизматрасонии соҳа дар назар аст.

Манбаъ меафзояд, ки интизор меравад дар ҷараёни форум масъалаҳои рушди сайёҳии устувор, густариши ҳамкории байналмилалӣ, ҷалби сармоягузорӣ, татбиқи лоиҳаҳои муштарак, рушди шарикӣ миёни шаҳрҳо ва субъектҳои хизматрасонии сайёҳӣ баррасӣ гардида, дар фарҷоми он санадҳои нави ҳамкорӣ байни доираҳои манфиатдор ба имзо расанд.

Гуфта мешавад, ки дар доираи DITE-2026 баргузории вохӯриҳои соҳибкорон дар шакли B2B, тренингҳои омӯзишӣ оид ба баланд бардоштани сифати хизматрасонӣ дар меҳмонхонаҳо ва тарабхонаҳо, такмили маҳорати касбии роҳбаладон ва таҳияи хатсайрҳои нави сайёҳӣ пешбинӣ шудааст.

Dialog.tj