Раёсати Вазорати корҳои дохилӣ дар шаҳри Душанбе аз ошкор кардани ҳафт ҳолати бо мошини шахсӣ ба донишгоҳ омадани донишҷӯён хабар дод.

Гуфта мешавад, ки аз ҷониби кормандони Шуъбаи огоҳонӣ ва пешгирии ҳуқуқвайронкунӣ миёни ноболиғон ва ҷавонони Раёсати ВКД дар шаҳри Душанбе дар ҳудуди муассисаҳои таҳсилоти олии пойтахт рейди муштарак баргузор гардид, ки дар натиҷаи он ҳафт ҳолати ба донишгоҳ бо мошини шахсӣ ҳозир шудани донишҷӯён ба қайд гирифта шуд.

“Саидов Сунатулло, Юсуфзода Раҳматулло ва Садирзода Саидмуҳаммад донишҷӯёни Донишгоҳи миллии Тоҷикистон, Юсупов Шаҳбоз ва Қурбонзода Сунатулло  донишҷӯёни Донишгоҳи славянии Россияву Тоҷикистон, Аҳмадов Муҳаммадҷон  донишҷӯи Академияи идоракунии назди Президенти Ҷумҳурии Тоҷикистон ва Миров Муҳаммад  донишҷӯи Донишгоҳи тиҷоратии Тоҷикистон бар хилофи талаботи мазкур амал намуда, бо нақлиёти шахсӣ ба донишгоҳ ҳозир шудаанд”, - навиштааст манбаъ.

Иттилоъ дода мешавад, ки вобаста ба ҳолати мазкур нисбат ба номбурдагон маводи зарурӣ тартиб дода шуда, ҷиҳати қабули қарорҳои дахлдор ба унвонии роҳбарияти Вазорати маориф ва илм, инчунин, ба донишгоҳҳои зикршуда ирсол карда мешаванд.

Тибқи муқаррароти амалкунанда, донишҷӯе, ки бо нақлиёти шахсӣ ба дарс ҳозир мешавад, ба муҳлати 3 сол бе ҳуқуқи барқарорсозӣ аз донишгоҳ хориҷ мегардад.

Dialog.tj